National Statistics Day vawi 19-na pualin hun hmang

National Statistics Day vawi 19-na pualin nimin khan ramchhung hmun hrang hrangah hman a ni.

National Statistics Day hi Indian Scientist leh Statistician ropui, Professor Prasanta Chandra Mahalanobis (1893-1972) piancham hriatreng nan kumtin June 29-ah hman thin a ni a, kumin hian June 29 hi Pathianni a nih avangin nimin khan hman a ni a, kumin-a National Statistics Day-ah hian ‘75 Years of National Sample Survey’ tih chu thupui atan hman a ni. Aizawl-ah chuan Economics & Statistics Conference Hall, MINECO-ah Directorate of Economics & Statistics buatsaihin National Statistics Day vawi 19-na hi hman a ni a, he hun hi Adviser to Chief Minister (Planning & Finance) TBC. Lalvenchhunga chuan khuallian nia hmanpuiin Sawrkar-in Planning a ngaih pawimawh thu leh Economics & Statistics-te hnathawh pawimawhzia a sawi a. Data dik leh rintlak neih a pawimawhzia te, a bik takin Market intelligent hnuaia Department hrang hrang Data inang khat neih a tul thu te, Multi Dimension Poverty Index Survey neih a tul thu te, GSDP Calculation Method fimkhur taka kalpui a pawimawh thu te, thawktute training neih tam a pawimawh thute sawiin, rah tha nei tura hnathawh a pawimawh thu a sawi a, Department hrang hrangte hlutna pawh an tam leh tlemah te ni lovin ram tana an an thawh hlawk leh hlawk loh dan (output) atangte a teh thin tur a nih thute a sawi bawk.

Planning & Programme Implementation Department changtu Secretary Lalmalsawma kaihhruai he hunah hian Lalrinkhuma Sailo, Principal Adviser lo ni tawh thin te, K.Lalrammuana, Principal Scientific Officer leh  Lalrinchhana, Principal Adviser ten thu an sawi bawk a. Principal Adviser Lalrinchhana hian District Domestic Product-te pawh neih tum chhoh nise a duh thu a sawi a. B. Lalrinhlua, Director, Economics & Statistics chuan an Department hmalakna te a tarlang bawk.

Chawhnu lamah Mary Lalrinchhungi, Joint Director kaihhruaiin University leh College thlan bik heng - MZU, ICFAI, PUC, GAC leh HBC-a zirtirtute leh zirlaite nen Technical Session hun hman ho niin he ni thupui hmanga thusawi ngaihthlak a ni bawk.