Lamnunthem Singson-i ruang an khua ah lak a ni

Ahmedabad-a Air India thlawhna tlaa Cabin Crew thi Manipur State mi Zohnahthlak nula, Lamnunthem Singson ruang chu nimin chawhnu khan Dimapur (Nagaland) thlenpui a ni a, mi thahnem takin ruang an lo hmuak a ni.

Lamnunthem Singson ruang hi Kuki Union, Dimapur leh Civil Society Organisation hrang hrang ten Airport-ah an lo dawngsawng a, ruang lo hmuahna hunah hian Nagaland sawrkar aiawhin Dimapur DC leh Dimapur Commissioner of Police te chuan a ruang chungah puan a lo dah a ni. 

Lamnunthem Singson ruang hi a chenna Manipur panin Dimapur atangin Kuki Students Organisation - Sadar Hills hruaina in chhuahpui nghal a ni a, nizan khan an chenna Kangpokpi chu thlenpui hman beisei a ni.

Air India thlawhna hi June 12, 2025 khan London pan tura Ahmedabad Airport atanga a thlawhchhuah hnu reilote ah a tla a, hetah hian a chhunga chuang mi 242 zinga 241 an thi a, hei bakah a tlakna hmun BJ Medical College-a lo awm mi tam takin nunna an chan bawk a ni.