CSR Implementing Agency tam zawk kan neih theih nana hma la turin CSR Cell an din thu CM in a sawi

Chief Minister Lalduhoma chuan CSR Implementing Agency tam zawk kan neih theih nana hma la turin Chief Minister Office-ah CSR Cell an din thu sawiin, CSR atana Project thehlut te pawhin DO letter an mamawh chuan an tanpui zel tur thu a sawi bawk.

Mizoram CSR Cell leh Confederation of Indian Industry (CII) te tangkawpin ni thum chhung awh Capacity Building Workshop for NGOs & Implementing Agencies an buatsaih kharna hun nimin-a I&PR Conference Hall, Aizawl-a an buatsaih a hmanpuina ah Chief Minister Lalduhoma chuan India ramah company tam tak an awm thu sawiin, “Dan anga CSR thehchhuah tur hi an ngah a, a kum telin a pung zel. Chutiang a nih lai chuan Mizoram chu CSR dawng tlem ber State kan ni reng thin. CSR Fund hmang hian ram hmasawnna hna, lian leh pawimawh tak tak a thawh theih a, Serchhip Hospital building sak nan pawh khian vbc. 21 zet kan hmu a ni. State dangte aia kan hnufual chhan hi CSR Implementing Agency kan neih tlem bik vang a ni deuh ber a, Implementing Agency tam zawk kan neih theih nana hma la turin Chief Minister Office-ah CSR Cell kan din ta a ni,” a ti.

Chief Minister chuan CSR Cell hian kawng hrang hrangin hma an la nghal tih pawh sawiin, “Kan mamawh hmasa chu Registered Agency tam zawk neih a nih avangin he training rawn chhimtu NGO ten Implementing Agency rawn nih ngei in tum tlat dawn nia,” tiin a chah a. “CSR Cell hi nangmahni tanpui tura din a ni a. In rawn berawn zel thin dawn nia. Nakin ah project te in thehluh hunah Chief Minister DO Letter in mamawh hun te pawh a la awm ang. Chung hunah pawh chuan min rawn hrilh thin rawh u, kan lo pui ang che u. In hlawhtlin chuan in Society in a hlawkpui ang a, thalaite tan hna in siam belh ang a, kan ram in kan hlawkpui dawn a ni,” a ti bawk.

He hun hi Planning Secretary Lalmalsawma Pachuau chuan kaihruaiin Adviser to CM leh CSR Cell Chairman TBC. Lalvenchhunga MLA pawhin thu a sawi bakah Training chhimtute atangin an thil zir an hlawkpui dan ngaihthlak a ni bawk.