Tung leh Sapthei chin lamah hmalak mek a ni

Cooperation Department changtu Minister PC. Vanlalruata’n Tung leh Sapthei chin lamah hmalak chho mek a nih thu a sawi.

Nimin khan Aizawl-a Dawrpui Multipurpose Centre-ah Mizoram State Cooperative Union (MSCU) General Assembly vawi 36-na neih a ni a, he hun hi hmanpuitu Cooperation Department changtu Minister PC. Vanlalruata chuan Tung leh Sapthei chu tunhnaiah hralhna a that thu sawiin, ching turin loneitute an hrilh thu leh tunah hian hmalak chhoh mek a nih thu a sawi a. Tung leh Sapthei-a hma la thar mek chu intelkhawma Society anga ding tura a duhsak thu leh an intelkhawm chuan an chak dawn thu a sawi a. An intelkhawm chuan thiltih a awlsam dawn thu leh khawl mamawh thut a awm pawha Society anga lei chu a awlsam zawk thu a sawi a ni. 

Cooperation Minister chuan Mizoram-a Cooperative Society ten an mamawh ber chu tanrualna nia a hriat thu sawiin, tanrual chuan chak zawkin hmalam a pan theih thu a sawi a. Cooperative Movement lamah thangthar lehkhathiam zawkte a tam thei ang ber an tel a tul tawh thu a sawi a, kum upa lam ten sulhnu tha tak tak nei mahse chak taka Cooperative Movement a than zel theih nan thangthar te hnuhluh a ngai tih a sawi a. Cooperative Society pawimawhzia sawiin, UNO pawhin a ngaih pawimawh em em a nih thu leh hmasawnna tluantling (sustainable development) a awm theih nan Cooperative Society din chu thil pawimawh tak a nih thu a sawi bawk.

Mizoram State Cooperative Union (MSCU) President K. Lalchamreia kaihhruai he hunah hian MSCU Chief Executive Officer K. Lalduhawma report pein K. Laldawngliana MLA bakah John L.T. Sanga, Registrar of Cooperative Societies ten thu an sawi bawk a, chawhnu lamah Rorel Inkhawm neih a ni bawk.

Mizoram State Cooperative Union hi kum 1975-a din niin kumin hi a kum 50-na, Golden Jubilee a ni a. Hetihrual hian harsatna avangin Annual General Assembly chu neih theih loh kum a awm zeuh zeuh avangin nimin-a Assembly hi a tum 36-na a ni thung. MSCU hnuaiah hian kum 2024 atanga kum 2025 chhungin Annual Fee pe Society 211 an awm a, State Level Cooperative Society 9 leh District Level Cooperative Society pakhat an awm bawk a ni.

Tun dinhmunah Mizoram-ah Cooperative Society 1326 awm mekin Primary Level, District Level leh State Level-ah te then hran leh an ni a. MSCU chuan heng Society Level hrang hrangte tan hian Training leh Awarenes programme te a buatsaih thin bakah Cooperation Department nen tangkawpin Busininess Reform Action Plan (BRAP) pawh duan mek a ni bawk.