Handholding Scheme-ah Loan dilna 588 pawm tawh

Handholding Scheme hnuaia Loan Component-ah dilna lut 588 te chu Line Department ten an pawmsak.

Nimin khan CM Conference Hall-ah Chief Minister Lalduhoma hovin Mizoram State Policy Coordination Committee chu thukhawmin Handholding Scheme hnuaia Progress Partner te hnena hmalak mek dinhmun an thlirho a. He huna tarlan a nih danin Handholding Scheme thawh khatna ah hian Loan Component-ah dilna 11,438 a lut a, Line Department ten 588 pawmin, heng zingah hian DPR siamsak ngai 1687 leh endik hmabak 8249 a awm mek a. Dilna 914 erawh chu hnawl (reject) a ni a, Reject sakte hi a dil dan dik hrilh a, dil tir leh vek dan dap zui tur a ni ang. Dilna pawmsak tawh Bank lama lut tawh zat chu 517 niin chung zinga mi 51 hnenah chuan Bank te hian loan an pe tawh a. Loan an la pekchhuah tlem chhan hi loan an hmuhna tam ber PMEGP portal a chian loh vang niin tunhnaiah a rawn tha leh tawh a, chak zawka an pek theih an inbeisei tih tarlan a ni.

Loan Component bikah hian mi in hma an lakna tura a sum mamawh tur dik tak aia tam daih diltu an tam avangin Line Department leh Bank lam tana lo pawm a harsat chang a awm a. Central Schemes te nena kalkawp (convergence) a nih bawk si avangin an dilna Scheme-in a phalsak chin aia tam Loan lo pawmsak chu a harsat thu sawilan a ni a. Hei bakah hian thlai leh ran insurance company ten fel fai zawk a an scheme an kalpui theih nana a tul anga hmalak an rel bawk.

Heng bakah hian Chief Minister Special Package-ah a thawh khatna ah mi 2000 target siam a ni a, a diltute zingah cheng nuai khat tling lo dil engemaw zat an awm avangin mi 2226 te chu dawng tura thlan an ni a, dilna thenkhat chu an hmalakna tura an sum mamawh zat aia tam dil an la awm nia a lan avangin a dawngtu tur zat hi a la danglam thei dawn nia ngaih a ni. CM Special Package dawng tura thlante hi a rang lama training pek tur an ni a, training an kal zawh ve leh sum hi pek an ni ang.

Nimin-a thukhawm hian tun July thla chhung hian Line Department ten dilna an la kawl te a tam thei ang ber lo endik se, August thla atang chuan dilna hi hawn leh tan nise an ti a. A Scheme kalpui zelna tur thil pawimawh hrang hrangte an sawi bawk.