MTA ten kawng an siam; lirthei chhuah turin ngen

Mizoram Tipper Association (MTA) District Hqrs. Kolasib in National Highway No. 06 leh 306 huamchhung Kawnpui leh Sairang inkara kawng chhe zual lai siam that hnatlang kar kalta Ningani atanga an neih chu Inrinni thleng khan chhunzawm a ni a, bungraw phur lirthei dan an nih avangin harsatna a thleng mek bawk.

MTA, Kolasib District Hqrs. hruaitute sawi danin Ningani atanga hnatlang an neih ah hian Inrinni khan Kawnpui Lung Quarry atangin Lung (boulder) an phur a, Kawng chhe zual lai ah chhekkhawm in, kawng chhe lai hnawh hnatlang chu Vawiin hian an thawk leh dawn a, Inrinni chawhma lam thleng khan Lung cubic metre 300 atanga 400 an chhek-khawl tawh a. Lung hi cubic metre khatah Rs 800/- zel in an lei a, Inrinni khan kawng hnawh hna thawk lovin Vawiin ah thawh a ni ang.

MTA hruaitute chuan ni thum zet kawngpui chhe zual lai thawmtha a hnatlang an neih tawh hnuah sawrkar atangin thu leh hla engmah an la dawn loh thu an sawi a, hetihlaia sawrkar in Kawnpui - Aizawl via Durtlang Road (tlang kawng) ah Buhfai phur lirthei lian chi a kal tir ta mai chu hriatthiam harsa an tih thu an sawi a. He kawng hi lirthei lian tlan phal lohna a nih avangin chet-sualna a thlen palh an hlauh thu an sawi bawk.

He hnatlang neih mek chungchangah hian Inrinni khan Kolasib Bawrhsap hovin SDO Civil Office Kawnpui-ah thutkhawm neih a ni a, he hunah hian Kolasib Bawrhsap chuan kawng siam hnatlang neih mek a nih avanga Lirthei dan mek an ni chu harsatna nasa zawk a thlen loh nan chhuah turin a ngen a; kawng chhe lai siamtha tur hian a theih anga chak a hmalakna kalpui zel a nih tur thu a sawi a ni. He hunah hian tuna lirthei tangkhang mek zingah driver damlo, ei leh in tlachham an awm tan tih tarlan a ni a; Medical Team leh Sanitation Team lamte pawh intir nghal tura ruahman siam a ni.