Sialhawk in Lakhuihthei tam zawk thar beisei

Khawzawl District chhunga awm Sialhawk khua chuan nikum aiin kumin hian Lakhuihthei thar tam an inbeisei.

Sialhawk Lakhuihthei Society Secretary Kawllianpuia sawi danin, Sialhawk khuaah hian chhungkaw 250 velin Lakhuihthei an ching a, nikum khan Lakhuihthei quintal 9000 vel an thar a, kuminah chuan Lakhuihthei hi quintal 12,000 vel tharchhuah theih an inbeisei thu sawiin, kumin bikah hian quintal 200 vel an seng tawh a, a seng runpui hi July thla tawp lam atangin August thla laihawl vel thleng an nei thin a ni.

Lakhuihthei hralh chungchangah hian kumtin harsatna nei thin mahse kumin ah chuan Clover Organic Company leh Tuichangral FPC hmalaknain Guwahati a Aromatic Company nen an indawr a, Aromatic Company hian an Lakhuih-thei tharchhuah te an leisak tawh dawn avangin harsatna an tawh an ring lo tih an sawi a, kumin a an tharchhuah ang te pawh an thawn thla zel tawh a ni. Sialhawk khawtlang hian kum 2015 vel atang khan khawtlang huapin Lakhuihthei hi an ching tan a, tuna Lakhuihthei ching chhungkaw 250 zingah hian chhungkaw 100 chuangin Lakhuihthei chin hi ei bel berah an hmang a ni.