Zirtirtu sawnkual vanga harsatna MNF in pawi ti

MNF Party chuan Zirtirtu sawn kual avanga harsatna awm mek chu pawi an tih thu sawiin, chinfel thuai an duh thu an sawi.

Nimin-a thuchhuah an siamah MNF General Hqrs. chuan ZPM kaihhruai sawrkar hnuaiah Zirtirtu sawn kual avanga Mizoram kil tina harsatna awm leh khawtlangin buaina an tawh a tam ta hle tih sawiin, pawi an tih thu an sawi a. Zirtirtu indaihlohna hi a bik takin thingtlang lamah a nasa hle nia sawiin, “Khawpui lamah zirlai tlemte awmna ah zirtirtu indaih taka an awm laiin, indaihlohna hmun zirlai ngah tak tak thingtlang ami te chhuhsak an ni fo mai hi hriatthiam har tak a ni a. Tunhnaiah khaw tam takin indaihlo taka zirtirtu an neih mek te a hnawhkhahna siam sak ni si lovin, khawpuiah sawnluh an awm reng mai a. Heng avanga thingtlang lam mangangin an zirtirtu sawnchhuahte kal chhuah phallova, lungawilohna lantir thawm hmuh tur a awm zurzut mai hi Zirna lama kan sawrkarin thingtlang mite a ngaihthah zia lantirnaah MNF chuan ngai a. Zirthiamna mamawh em em thingtlang mipuite hmasawn tir kan sawrkar hian a duh lo ah a ngai bawk a ni,” an ti.

MNF Party chuan nitin zirna dawn mamawh ve tho thingtlang zirlaite mamawhna chhang turin ZPM sawrkar chu a rang thei ang bera hma la tura an phut thu sawiin, “Mipui hnena chhiah tam tak an khawn belh ur ur hmang hian Zirtirtu indaihlohna avanga harsatna awm teuh hi chingfel thuai turin kan phut takzet a ni,” an ti bawk.