Kuthnathawktute tana ding tlat an nih thu Minister in sawi

Land Resources, Soil & Water Conservation Department changtu Minister Lalthansanga chuan tun sawrkar chu kuthnathawktute tana ding tlat an nih thu a sawi.

Mizoram Kuhva Chingtu Pawl, Mamit District Headquarters Inkhawmpui nimin-a Mamit Chhim Veng YMA Hall-a neih a hmanpuina ah LRS&WC Minister chuan, “Tun sawrkar hi kuthnathawktute tana ding tlat kan ni a, Chief Minister thahnem ngnaihna zarah hma pawh kan la nasa em em a ni,” a ti a. “Kan sawrkar tirh phat khan kuhva chingtuten harsatna kan tawk nghal a, chutihlaiin kan Chief Minister chuan kuhva chingtute hi Progress Partner-ah a puang a, kuhva chingtuten sawrkar atangin tanpuina a tam thei ang ber an hmuh theih nan hma kan la chho mek zel a, hmasawnna hmel thar hmuh zel pawh kan beisei a ni,” a ti a. “Kuhva hi Mizoram hian hun engemaw atang khan kan ching nasa viau mai a, thiamna sang zawka enkawl a nih theih nan Kuhva hi Hand Holding hnuaiah dah a ni a, kuhva chingtuten harsatna hrang hrang kan tawhte Soil Engineer ten zirchiangin; heng harsatna te hi chinfel a nih theih nan rim takin hna an thawk a. Kuhva hi thlai dang ang a ni lova, uluk taka chin leh enkawl a ngai a, mithiam ten tih dan tur an tih ang zelin tih hram hi a tha a ni,” a ti bawk.

LRS&WC Minister chuan kan sik leh sa a inthlak danglam zel tih sawiin, “Kan ram leilung mil leh mithiamte rawn chung zelin kan thlai te enkawl ila. Khawthlang tlangdung hi thlai chi hrang hrang hian a ngeih em em mai a, kuhva chauh lo pawh thlai dang hi a thar hma em em a, Mizoram tan chhenfakawm khawpin a ram leilung hi a hausa a ni” a ti a. “ZPM hian rotlingin hna thawh kan tum a, kut tling lo-a hnathawh reng reng chu action kan la zel dawn a ni. Phun lungawi mai lovin hna tha lo reng reng chu kan hotute hnenah hriattir vat ila, khua leh tui tha kan ni dawn a ni,” a ti bawk.

Mamit Kuhva Chingtu Pawl hi nikum February 20-a din kha niin member 350 chuang an awm tawh a, an Kuhva phun zawng zawng chu nuai 10 chuang niin kum 2023-2024 khan cheng nuai 40 chuang an la lut a ni.

Minister Lalthansanga hian nimin vek khan Mamit-a a Department chan hrang hrangte Pisa chu a tlawh nghal a, he hunah hian District Sericulture Officer (DSO) Office te, District Fisheries Development Officer (DFDO) Office leh District Officer LRS&WC Office bakah Divisional Forest Officer (DFO) Office te a tlawh a, Department hrang hranga thawktute chu Sawrkar kaltlanga mipuite hamthatna tur leh khaichhuahna tura hmalakna awm reng rengah a chhawrtu mipuite hnen thleng ngei tura hma la tura chahin, hna entawntlak taka thawk turin a chah a. An mamawh an lo thlen te pawh a theih anga tih hlawhtlin tum a nih thu a sawi bawk a ni.