Meichher Chanchinbu Golden Jubilee lawmna Education Minister hovin neih a ni

Directorate of School Education hnuaia Adult Education Wing buatsaihin ‘Meichher’ Chanchinbu Golden Jubilee lawmna neih a ni a, he hun hi School Education Minister Dr. Vanlalthlana chuan hmanpuiin Meichher Jubilee Special Edition a tlangzarh bakah Jubilee chhinchhiahna thu tar (monument) a hawng nghal bawk.

Meichher Golden Jubilee lawmna ah hian Education Minister chuan Adult Education Wing hnuaia chanchinbu chhuah thin, Meichher chu ram hmasawnna mei hliau kaia chhem alhtu hlu tak a nih thu leh kum upate hnena ziak leh chhiar zirtirna hmanraw tangkai tak a nih thu a sawi a. Meichher chanchinbua thu leh hla lama mi ropuite sulhnu chhiar tur tam tak a awm chu hlu a tih sawiin, he hmalakna hi duhtawk mai lova chhawmnun zel a tul thu a sawi a. Ziak leh chhiar thiamah duh tawk mai lova, hmalam hun ngaihtuah chunga sum enkawl leh peipun dan ‘financial literacy’ thiam tuma ngaihven a tul thu pawh sawiin, kalkhawmte chu mahni inhaikuak tum tur leh mithiam zawkte rawn hreh lo turin a chah bawk.

He hunah hian Meichher Editor hmasa ber leh Padma Shri Award dawngtu R. Lalrawna hnen atangin bul an tan dan leh hmalak tawh dante ngaihthlak a ni a. Meichher chu ziakmite nena thawhhona tha leh ram hmasawnna atana thahnemngaihna rah a a nih thu sawiin, Meichher chanchinbuin kum 50-na hmel a hmu ta chu ropui a tih thu a sawi a ni.

Meichher Editor TC. Lalremsiama report atanga a lan danin Adult Education Wing, Directorate of School Education-in a tihchhuah, Meichher chanchinbu hi March-April, 1975 khan ‘Zoram Eng’ tih hming puin a vawi khatna atan chhuah a ni a. October, 1975 atangin ‘Meichher’ tih hming hi a pu a. Kum 50 chhung chu copy 3000 zel chhuah niin, June 2025-a chhuah chu bu 808-na a ni a. Meichher tihchhuah tan atangin Publisher atan Department Director hman a ni a. Mizo zinga ziaktu lar kan neihte kutchhuak a lo chuang nual tawh a, ziak thenkhat chu Mizoram Board of School Education hnuaia Mizo zirlaibu-a telh a lo ni tawh bawk a ni. 

Meichher Golden Jubilee Pual hian Mizo Academy of Letters (MAL), Mizo Writers Association (MWA), Mizo Poetry Society (MIPOTY)-te nen tangkawpin article inziahsiak leh poetry inphuahsiak huaihawt a ni a. Nimin-a hun hman ah hian lawmman sem nghal a ni bawk a. Article inziahsiak ah hian Article 65 lutin inelna hi Category 4-ah siam a ni a. Poetry inphuahsiak-ah Category-ah 5-ah intihsiakna neih niin Poetry 172 zet a lut a. Open Category-ah Vanlalthlana, Serchhip Vengchung, (Darfeng Uria) chuan lawmman pakhatna a dawng a ni.

Nimin-a he hun hman hi School Education Department Director Angela Zothanpuii chuan a kaihruai a ni.