MSCPCR in an phu tawk hremna pek ngei duh

Mizoram State Commission for Protection of Child Rights (MSCPCR) Chairperson Jimmy Laltlanmawia’n tunhnaia naupang khawih chhetu Lalrampana leh midang hetianga inhnamhnawih ten an phu tawk hremna hmu ngei se an duh tih a sawi.

MSCPCR Chairperson hian nimin khan thuthar thehdarhtute kawmin tunhnaia naupang kumtlinglo khawih-chhiaa, midang hmuh theih tura hursualna video bawlhhlawh siam nana naupang inhnamhnawihtirtu leh pholangtu Lalrampana chu CBI ten tun thla ni 9 khan an rawn man thu leh he thil thleng hi Commission chuan pawi an tih takzet thu a sawi a. POCSO Act chuan naupang laka hursualna leh zahmawh rawngkai lanna video leh thlalak reng reng, mimal kawlthat tur a ni emaw, midang hmuha pholan tur a ni emaw pawh a khap tlat tih sawiin, Dan bawhchhetu chu kum 5 aia tlem lo Lung-In tan tir leh sum chawitir thlengin a huam thu leh a tisual nawntu chu kum 7 thleng tang tura hrem theih a nih thu a sawi bawk a ni. 

Jimmy Laltlanmawia chuan Information Technology (IT) Act hmangin kum 5 aia tlem lo Lung In tan tir leh cheng nuai 10 chawitir thlengin a huam thu a sawi a, a tisual nawn tu chu kum 7 thleng tâng tura hrem leh cheng nuai 10 chawitir theih a nih thu a sawi bawk a. Heng Dan bawhchhiatna Mizoram chhungah thleng tawh lo se an duh thu a sawi a ni. 

MSCPCR hotute chuan tunah hian POCSO Act hnuaiah Mizoram chhunga District Court hrang hrangah thubuaikal lai 194 a awm mek thu an sawi bawk.