UG Result chhuakah Govt. Serchhip College titha khat

Mizoram University (MZU) Examination Department chuan nimin khan kumin a Under-Graduate Semester hrang hrang Exam result a tichhuak a, VI Semester-ah Govt. Serchhip College pawh an titha tawhkhat hle.
Nimin-a result tihchhuah taka a lan danin Govt. Serchhip College-ah hian Bachelor of Arts VI Semester-ah zirlai 88 exam in 63 an pass a, za zela 71.59 pass ang an ni a, Bachelor of Arts (Repeater)-ah mi 12 ten exam hmachhawnin mi 8 an pass bawk a, za zela 66.67 pass ang an ni bawk. Bachelor of Science (B.Sc) VI Semester-ah zirlai 17 ten Exam beiin zirlai 10 an pass a, za zela 58.82 pass ang niin Bachelor of Science (Repeater)-a Exam mi pakhat erawh a pass zo lo thung a ni. Bachelor of Computer Applications (BCA)-ah mi 6 exam in 3 an pass a, za zela 50 pass ang an ni bawk.

Kumin-a Undergraduate Exam-ah hian zirlai 4461 in Exam an hmachhawn a, zirlai 3515 an hlawhtling a, Bachelor of Arts-ah zirlai exam 3759 zingah 2946 an pass a, Science-ah zirlai exam 431 zinga 320 ten hlawhtlinna an chang a, Commerce-ah Exam 260 zinga 241 pass in Home Science ah zirlai exam 11 zinga 8 te an pass bawk.

Bachelor of Arts-ah hian Lalremsiama, Pachhunga University College-a Political Science Department ami chu a pumpuiah pakhatna a ni a, B.Sc-ah Yerrabelli Dedeepya Reddy, Pachhunga University College-a Biotechnology Department ami chu pakhatna niin Commerce ah R. Lalngaih-awmi, HATIM ami chu pakhatna a ni a, Home Science-ah Zirtiri Residential College ami Mary Lalawmpuii pakhatna a ni bawk.

MZU Controller of Examinations Prof. Lalnuntluanga chuan Zirlai hlawhtlinna chang ta te a lawmpuithu sawiin, ram leh hnam tana an thiamna te chhenfakawm taka hmang turin duhsakna a hlan a. Hlawhtlinna la chang rih lote pawh hun lo kal leh tur atana inbuatsaihna tha zawk nena exam hmachhawn turin a chah bawk a ni.