Thubuai neih ah thudik hailan ngei an duh thu sawi

Mizoram Pradesh Congress Committee (MPCC)-a General Secretary leh MLA hlui R. Lalrinawma chuan an MLA, C. Ngunlianchunga thubuai chungchangah thudik hailan a nih ngei an duh thu a sawi.

Nimin khan MPCC hian Aizawl-a Congress Bhavan-ah Monday Devotion leh Political Session neiin he hunah hian MPCC General Secretary R. Lalrinawma chuan C. Ngunlianchunga thubuai chungchang hi sawiin, “He Case, Lawngtlai By-pass Road laih hna thawhah sum tih chingpen a awm a ni ti a ACB-ten FIR (No.4/2022 U/S 11/13(2) r/w 13(1)(a)(b) P.C. Act 1388 leh U/S 409/120 B/34 IPC Dt. 26.05.2022)-a ziahluh daih tawh a Pu Nguna an hnuhluh nachhan chu a CEM hun laiin Lawngtlai By-pass Road laihna tur sum cheng nuai 1143.87 NLCPR atangin ni 26.11.2012-ah Ministry of DONOR-in a Approved a, District Council Affairs Department, GoM-in 1st Installment cheng nuai 457.54 pawh Ni 2.08.2013-ah a released a ni,” a ti a. “Pu Nguna hunlai hian DPR siamna senso Ni 3.10.2013 a pek leh Compensation Provision a awm loh avangin ram neitute leh LADC Official-ten ni 16.09.2013-a Meeting an neih bak a hna thawh tak tak leh Compensation pek vel te chu Pu Nguna CEM tawh loh hnu, MLA, Minister a nih hnu vek a thil thleng a ni,” a ti.

MLA hlui R. Lalrinawma chuan, “Pu Nguna hian ‘Case ka neih ka hrelo, chengkhat mah ka eiru lova Anticipatory Bail ka dil lovang’ a tih ang ngeiin a dil ta lo reng a, hemi hnu hian ACB lamah Case a neih leh neih loh a va zawt a, Case a neih thu an lo hrilh chauh a ni. Hemi hnu pawh hian Anticipatory Bail chu a dil ta chuang lova, a huaisen thlak hle a ni,” a ti a. He thubuai kal zel dan sawiin, “April 29, 2025-ah Prosecution Sanction pek a ni a. May 26, 2025-ah Chargesheet Special Court P.C. Act-ah thehluh a ni. June 17, 2025-ah Special Court chuan Pu Nguna, Pu V. Zirsanga leh Pu VL Hmuaka te Court-a inlan turin a ko. Pu V. Zirsanga leh Pu VL Hmuaka te chuan Anticipatory Bail an lo lak tawh avangin Chargesheet Copy pek hnuah Court leh hun tur hriattir an ni,” tiin “He Case hi rang taka ngaihtuah a nih a dikna a lanchhuah thuai leh thil ti diklo an awm chuan an phu tawk a hrem an nih thuai hi kan duh dan a ni a. Court-ah rinna kan nghat tlat a, thudik hailan a nih ngei kan duh a ni,” a ti bawk.