Horticulture College din champhaphak lawm a ni

Thenzawl-a College of Horticulture chuan nimin khan an dinchamphaphak vawi 9-na an lawm a, Agriculture Minister PC. Vanlalruata chuan a hmanpui a ni.
College of Horticulture Academic cum Administrative building-a hun hman ah Agriculture Minister PC. Vanlalruata chuan College of Horticulture Thenzawl dinchamphaphak vawi 9-na lawm theia an awm chu thawktute leh zirlai te thahnemngaihna vang a ni tih sawiin, a lawmpui thu a sawi a, “Zirtirtu tha tak tak leh State hrang hrang atanga lokal zirlaite thawhrimna avangin College hi zirna tha tak leh zirlai tha tak tak chher-chhuaktu a lo ni ta, tiin Mizoram tan hmasawnna thlentu pawimawh tak a la ni chho zel dawn tih a sawi bawk. Minister chuan Agriculture lama zirna leh thiamna te hi loneitute leh kuthnathawktute hlawhtlinna thlentu a ni tih pawh sawiin, he College ngei pawh hian an thiamna hmangin kuthnathawktute vawi tam tak an lo tanpui tawh thin tih a sawi a. “In thiamna leh theihna te Mizoram mipui tan tangkai taka hmang chhunzawm turin ka ngen che u a ni,” a ti bawk.

He hunah hian he College-a Dean Dr. Shri Dhar pawhin Horticulture chu Mizoram-a development thlentu pawimawh tak a ni tih sawiin, Mizoram ei leh bar zawnna kawngah hmasawnna chak lehzuala kan hmuh theihna tur a nih a beisei thu a sawi bawk.

College of Horticulture, Thenzawl hi June ni 18, 2016 khan Selesih-ah din tan a ni a, July 1, 2019 atangin tuna an awmna Thenzawl ah hian an awm tan a. An Campus hi Hectare 120.38 a zau niin Teaching Staff 13, Non-Teaching Staff 6 leh Contractual Staff 16 bakah Ssecurity 12 an awm mek a ni. Zirlai mipa 39 leh hmeichhia 57, an vaiin 96 an awm mek bawk.

College of Horticulture, Thenzawl-ah hian Mizoram in seat 6 a nei mek a, Batch tinah Higher & Technical Education Department chuan SMATEE kaltlangin a zir tur hi an thlang thin a ni.