Kawng siamin hnatlang; kawng siam mek sawiho

Mizoram Tipper Association (MTA), Ko-lasib District Hqrs. bultumin tunkar Ningani khan NH-06 leh 306 huamchhung kawngpui chhe zual lai thawmthat anih avangin lirthei thahnem tak an tangkhang mek.

Kawnpui leh Sairang inkara Kawnpui leh Tuitun inkar kawngpui chhe zual lai siamthat hnatlang ah hian MTA member te, Kolasib Sub-Hqrs. YMA hnuaia Town chhung Branch YMA hrang hrang aiawh te, Awithangpa Group YMA hnuaia Branch hrang hrang atanga thawkchhuak te leh lirthei enkawltu pawl dang aiawhte an tel a. Hnatlang-a thawkchhuak te hian kawng chhe lai Lung hmangin an hnawh a, Kawng khuar hnawh nan hian Mizoram Tipper Association, Kolasib District Hqrs. chuan lung Motor lian phur 28 an lei a, an Lung lei khawlsa in a daih loh avangin hna a khaihlak deuh thung a, lung hi lei tur a awm chuan hnatlang hi karleh Thawhlehni thlengin neih tum a ni bawk.

Hetihlai hian Kolasib District Bawrhsap Robert C. Lalhmangaiha kaihhruaia thutkhawm ah Mizoram ei leh bar lakluhna National Highway kawngpui chhia tam zawk chu Railway hnuaia Company-te hnathawhna avang chhia a nih thu tarlan a ni a. Nimin khan Kolasib DC Conference Hall-ah Kolasib District Bawrhsap Robert C. Lalhmangaiha kaihhruaiin Mizoram ei leh bar lakluhna National Highway kawngpui siamthat mek chungchang sawiho a ni a, he hunah hian NHIDCL Manager Saksham Tyagi chuan kawngpui an siam meka Company-te'n harsatna an tawk mek chungchang presentation hmanga tarlangin, Railway Company-te bakah kawngkam a Petrol Pump siamtuten dan an zawm loh vangin kawngpui in a tawrh dan hrang hrangte a tarlang a, Petrol pump tam zawk chu National Highway Authority-ah phalna Final Approval nei lo leh dan zawm famkim lova Oil hralhchhuak an nih thu sawilan a ni bawk.