Bawlhhlawh tawih thei lo paihna siam mek a ni

UD&PA Department changtu Minister K Sapdanga'n Tanhril daia bawlhlawh tawih thei lo paihna siam zawh a nih hunah chuan Tanhril-ah bawlhhlawh tawih thei lo chauh paihin Tuirial-ah tawih thei chauh paih a nih tur thu a sawi.

Aizawl khawpui chhunga Veng Fai inelna Programme khuhhawnna chu Zirtawpni zan khan Tuikhuahtlang-a Central YMA-ah neih a ni a. He hunah hian Minister K. Sapdanga chuan Tuirial-ah Damdawi In bawlhhlawh hrang hrangte paihna hmun siam a nih thu te; Tanhril dai-ah bawlhhlawh tawih thei lo paihna tur siam mek a nih thu leh Hualngohmun ramah In sakna bungraw liante paihna leh sawngbawlna paihna tur siam mek a nih thu sawiin, Tanhril daia bawlhlawh tawih thei lo paihna siam zawh a nih hunah chuan Tanhril-ah bawlhhlawh tawih thei lo chauh paihin Tuirial-ah tawih theih chauh paih a nih tur thu a sawi bawk a ni.

Nikum-a YMA Rorel Inkhawm vawi 4-na in a rel angin faina leh thianghlimna kawnga inzirtirna turin kawng hrang hrangin Central YMA chuan hma a la mek a, hemi bawhzuina pakhat atan Central YMA, UD&PA, Aizawl Smart City Ltd leh AMC te chuan Coordination Committee dinin Aizawl khawpui chhunga Veng hrang hrangte faina kawnga inelna a buatsaih dawn a. Endik vawi khatna hi kumin September atanga December thleng neiin endik vawi hnihna chu nakum January atanga March thla ah neih leh tur a ni a, Result puan hun atan nakum Chanchar Kut Program chu ruahman lawk ni bawkin lawmman pakhatna atan Rs. 300,000/-; pahnihna atan Rs. 200,000/- leh pathuma atan Rs. 1,00,000/-ruahman a ni.