Mizoram Polytechnic Lunglei Building kalh leh

Mizoram-a Diploma Engineer zir theihna hmasa ber Mizoram Polytechnic Lunglei Building chu a tum hnih nan Court thuchhuak angin nimin khan kalh leh a ni.

Lunglei District Civil Judge Lalthansiami Hnamte chuan building kalhna tur thupek hi kumin June 25-a a chhuah hnuah nimin khan Lunglei Police ten Main Building, Science Block, Seminar Hall & Library, Fitting & Pumbling Shop, Workshop, Farm House leh Store Room te an kalh a. Thudawnna in a tarlan danin Polytechnic-ah hian zirna kalpui a la ni rih lova, thla thar ni 9-a kai tan tur an ni a, Polytechnic staff te hian Principal Room-ah Meeting neiin Building kalh tur hi hriattirna an dawn thu leh harsatna hi chinfel theih nise an duhthu an sawi a, Police ten Building an kalh lai hian harsatna engmah a thleng lo a ni.

Mizoram Polytechnic Lunglei hi hun rei tawh tak atanga an ram neitu Vanlaldawngliana, Theiriat hnena luahman pek a nih loh avangin Court-ah a khing a, nikum November 7 khan Court chuan Mizoram Polytechnic building zawng zawng khar sak turin thupêk a lo chhuah tawh a. Khami tuma kalh a nih loh chhan chu zirlai ten Exam an hmachhawn avang leh Court sang zawk, Supreme Court-a thlen tum a nih thudawn vang a ni a, tunah hian huntiam chhung, ni 90 hnu ah pawh sawrkarin ram hawh man a pek theih loh vang leh Court sang zawk atanga thu engmah an hmuh loh avangin kalh sak an ni leh ta a ni.

Mizoram Polytechnic Building luahman sawrkarin a bat hi Rs. 88,13,268/- nia chhut a ni a, Mizoram Polytechnic Lunglei huamchhunga ram neitu hnenah sawrkarin  leiba a pek loh avanga  zirna In khar sak an nih thleng pawha sawrkar hmalakna hriat tur a awm lo chu MSU Regional Hqrs. Lunglei chuan chhim lama zirna In pawimawh ngaihsak loh naah an ngai tih nimin khan an sawi bawk a ni.