Beti Bachao Beti Padhao Plantation Drive neih a ni

Directorate of Women & Child Development hnuaia State Hub for Empowerment of Women (SHEW) buatsaihin nimin khan ‘State Level Beti Bachao Beti Padhao Plantation Drive, 2025’ chu neih a ni.

Aizawl Sumtual (Aizawl Smart City Project) a hemi puala hun hman chu Larsap General (Dr) Vijay Kumar Singh chuan hmanpuiin Sawrkar laipui hmalakna Mission Shakti kaltlanga Beti Bachao Beti Padhao puala thingphun chuan hmeichhe nau-pangte hmasawnna tur leh environment tha nei tura hmalakna ngaihpawimawh a tulzia a entir a ni, a ti a. Hmeichhe naupang leh thingtiak phun ten danglamna thlen turin enkawlna leh chhawm-dawlna tha an dawn a tul tih sawiin, tun tuma thing-tiak a phun chu Mizorama hmeichhe naupang zawng zawngte pual a nih thu leh hei hian chakna, finna leh zahawmna pe se tih chu a duhdan a nih thu a sawi bawk.

He hunah hian Social Welfare, Women & Child Development Minister Lalrinpuii pawhin thawhhona tha tak hnuaiah hmeichhe naupangte dinhmun chawikanna Scheme pawimawh tak Beti Bachao Beti Padhao (BBBP) kalpui a ni chu lawm-awm a tih thu a sawi a. Mizoram chuan Sex Ratio at Birth dinhmun tha tak, National Level aia tha zawk kum 2022-23 ah 935 leh kum 2023-24 ah 956 te a neih thu a sawi a. Beti Bachao Beti Padhoa chungchang inzirtirna nasa taka kalpui a nih thu tarlangin, nikumah IEC tiam lovin mi 70,208 te hnenah zirtirna pek a nih thu leh Plantation drive pawh tum 54 neih a nih thu a sawi bawk.

Nimin-a he hun hman hi Social Welfare, Women & Child Development changtu Commissioner & Secretary Lalzarmawii chuan kaihruaiin hun hman zawh a nih hnu hian thingtiak phun zui a ni a, he hunah hian Larsap General (Dr) Vijay Kumar Singh, Social Welfare Minister Lalrinpuii leh Commissioner & Secretary Lalzarmawii bakah Chief Electoral Officer Dr. Lalrozama leh Law & Judicial Secretary T.L. Guite ten  thingtiak an phun a ni.