CM hovin thutkhawm nei

Ministry of DoNER-in India hmarchhak hmasawnna tura Economic Corridor hmathlir duang tura a din, High Level Task Force on North East Economic Corridor chu nimin khan an Convener leh Chief Minister Lalduhoma hovin biakhmuhtheihna hmangin an thukhawm a, he hunah hian DoNER Minister Jyotiraditya Scindia leh Meghalaya Chief Minister Conrad Sangma te bakah Assam atangin Minister leh Manipur Chief Secretary te an tel a. MoRTH-a Secretary leh sawrkar mi pawimawh dangte an tel bawk a. He Task Force hi Ministry of DoNER-in India hmarchhak hmasawnna ruhrel pawimawh thawh tur ruahmanna neia rawtna siam tura a din a ni.

He thutkhawm ah hian Chief Minister Lalduhoma chuan Hmarchhak infrastructure tih-changtlun tulzia tarlangin, “Mizoram Road density chu India ram average aiin a hniam zawk hle a, infrastructure dangah pawh kan la hnufum hle. Infrastructure te kan tihchangtlun hian chhaklam a Asian ram te nena kan inkalpawhna kan titha a ni nghal zel a, thawh tur a tam hle a ni,” a ti a. Hmarchhak Bial te tana hmathlir fel tak neia hmalakpuitu DoNER Minister Jyotiraditya Scindia chungah lawmthu a sawi bawk.