Mizoram-ah International Day of Yoga hman a ni

International Day of Yoga vawi 11-na chu Inrinni, June 21, 2025 khan khawvel hmun dangte rualin Mizoram-ah pawh hman a ni.

Mizoram-a International Day of Yoga puala hun hmanna pui ber Aizawla Rajiv Gandhi Stadium-a neih chu Larsap General (Rtd) Vijay Kumar Singh chuan a hmanpui a, India ram atanga bultan leh chawilar, Yoga-in khawvel pum a dengchhuak leh hleibik nei lova ngainatu an pung zel chu lawmawm a tih thu a sawi a, hemi pual liau liaua ni bik 'International Day of Yoga' kumtin-a hman a ni chu India ram tana chhuanawm leh chhinchhiah tlak tak a nih thu a sawi a. Yoga chu taksa, rilru leh ngaihtuahnate tha taka thlunzawma hriselna tha thlentu a nih thu sawiin, Yoga exercise hrang hrangte chuan taksa leh rilru hrisel nan tinzawn leh hnathawh dan bik an nei hran theuh tih a sawi bawk.

Governor chuan Yoga awmzia leh kalpui dante tarlangin, Yoga chuan awmze nei taka taksa sawizawi, boruak tha hipluh leh ngaihtuahna sawrbingte a huam thu a sawi a. Dan dik taka Yoga tih chuan hriselna a thlen rualin, tihdan dik tawk lo erawh in nghawng tha lo a thlen theih thu sawiin, Yoga ngainatute chu AYUSH hotute leh mithiamte atanga inzir hmasa thin turin a chah a. Mizoram chu boruak thianghlim tamna a nih thu leh hei hian taksa leh rilru hriselna kawngah hlawkna tam tak a thlen thu sawiin, Yoga exercise uar zawka kalpui kawngah pawh tangkaina a neih ngei a beisei thu a sawi bawk.

Ministry of AYUSH chuan International Day of Yoga 2025 hman dan tur Signature event 10 duangin, Mizoram-ah chuan heng zinga pahnih - Yoga Sangam leh Harit Yoga-te hi kalpui a ni a. Yoga Sangam hian a ruala a tam thei ang ber Yoga neih a entir a. Harit Yoga hian he ni denchhena thing leh mau leh luidungte humhalha tihfai a entir a ni. He ni pual hian Mizoram hmun hrang hrangah thingphun niin, Directorate of AYUSH chuan a duh apiangte tan ramhmul damdawi tiak an sem chhuak bawk.

Kumin-a International Day of Yoga-a thupui thlan ‘Yoga for One Earth, One Health' tih hian yoga exercise thatna lam ringawt thlurbing lovin, Environment humhalh lam ngaihpawimawh tel a kawk a. Mimal hriselna mai piah lamah, kan chhehvela thil nung leh sik leh sate nena inkungkaihna tha leh hrisel vawnnun a tum a ni.

Mizoram-a he ni puala hun hman ah hian India ram puma International Day of Yoga lawmna pui ber, Vishakapatnam, Andra Pradesh-a neiha Prime Minister thusawi ngaihthlaka thlirho a ni a. Hemi hnu hian Common Yoga Protocol hmangin kalkhawm zawng zawng te'n a huhovin Yoga Instructor-te kaihhruaina hnuaiah yoga exercise chi hrang hrang lain, taksa leh rilru sawizawina hun an hmang a ni.