Kum 5 chhungin Sikserh vanga thi 46 an awm

Kum 5 kalta chhung khan Mizoram-ah Sikserh (Malaria) natna vei mi 59,119 hmuhchhuah niin an zingah mi 46 in an thih phah a, nikum chhung khan mitthi 7 an awm a ni.

Health & Family Welfare Department hnuaia National Vector Borne Disease Control Programme (NVBDCP) hotute sawi danin nikum (2024) chhung khan Mizoram-ah Sikserh natna an vei leh vei loh thisen endik sak mi 3,07,468 an awm a, chung zinga mi 16,899 chuan Sikserh an kai a, an zinga 7-in nunna an chan a. Sikserh natna kai zinga 8,950-te hi PF niin midang 7,949-te chu PV an ni. 

Nikum chhung bik hian Lawngtlai District-ah Sikserh vei an tam ber a, mi 8,067 awmin an zinga mi 5-in an thihpui a, an District-a mi cheng 1,000 zela chhuta vei zat hi 56.70 niin Mizoram-ah an sang ber a, thisen endik atanga Sikserh hri kai hmuhchhuah hi za zela 16.60 zet a tling bawk a ni. 

Nikum chhung vek khan Lunglei District-ah Sikserh natna vei mi 3,775 hmuhchhuah a ni a, thihpui awm lovin Mamit District-ah mi 3,299 in an vei a, mi pakhat in a thihpui thung a. Kum 5 chhung, kum 2020 leh 2024 inkar chhung khan kum 2023-ah Malaria thihpui an tam ber a, mi 13 an thi a, kum 2021 leh kum 2022 khan mi 10 ve ve an thi a, kum 2020 khan mi 6 thiin nikum khan 7 an thi a ni.