MUHCS-a inziaklut turin Minister in sawm

Health Minister Lalrinpuii’n damdawi In-a mahni sum seng lova in enkawl theihna sawrkar in a ruahman, Mipui Healthcare-ah inziahluh hun chhung June thla ralhmaa inziaklut theuh turin mipuite a sawm.

Health Minister hian mipuite hnena thuchah a siamah Mizoram Universal HealthCare Scheme (MUHCS) hnuaia inziahluh hun an hawn June thla a tawp hnaih avangin mipuite inziaklut turin a sawm a, AB-PMJAY chhungkaw nuai 2 chuang, sawrkar hnathawk chhungkaw 50,000 chuang leh Pensioner chhungkaw 3000 bakah mipui nawlpui chhungkaw 5000 chuangin Healthcare an zawm tawh tih a sawi a. Tupawh damloh mangan tawk thei vek an ni tih sawiin, sawrkar ruahman Mipui Healthcare-a inziahluh chu a pawimawh takzet tih thu leh mipuiten mahni awmna hnai Sub-Centre emaw, online hmangin emaw inziahluh tur a ni tih a sawi a ni.

Mizoram Health Care Society hotute chuan MUHCS-a inziaklut turte tana inziahluh hun hmasa tawp hun chu June thla tawp thleng a ni tih an sawi a, inziahluh hun hi thla khat chhung chawlh a nih hnuah August thla ah hawn leh a ni anga, heta inziaklut te chuan tuna inziahluh man pangngai aia zaa 50-a sang an chawi a ngai dawn thung a ni. Hriat theih chinah tun thla ni 24 thleng khan MUHCS-a mi nawlpui sum chawia inziaklut chu chhungkaw 7,835 leh Pensioner inziaklut 9310 an awm tawh a. MUHCS kalpui a nih hnuah damlo 12,864 enkawl an ni tawh a, damlo enkawlna senso sawrkar in a pekchhuah chu  cheng vbc. 15.09 a tling tawh a ni.