Khawtlang tana hnawksak leh tha lo thlenna tur Vantlang Viltu Mobile Application tlangzarh a ni

Serchhip mipuiten khawtlang tana hnawksak leh tha lo an hmuh te awlsam taka a thlalak nena thuneitute hnena an report zung zung theihna tur, ‘Vantlang Viltu Mobile Application’ chu nimin khan Chief Minister leh Serchip Bialtu MLA Lalduhoma chuan a tlangzarh.

Vantlang Viltu Mobile Application tlangzarhna puala inkhawm Serchhip DC Pisapui Hall-a neih ah Chief Minister leh Bialtu MLA Lalduhoma chuan mipuite leh sawrkar inlaichinna tipungtu tur, thawhhona tithatu tur, chawpchilh taka mipuite mamawh tihhlawhtlinna, harsatna tawk te tanpuina ni nghal bawk - ‘Vantlang Viltu Application’ Serchhip in a nei ta chu lawmawm a tih thu sawiin, hetiang ngaihtuah chhuaktu DC leh a thawhpuite chungah lawmthu a sawi a. “Mipuiten tangkai taka hman kan tum anga, mipuite harsatna rawn sawi apiang te chu a mawhphurtuten tha takin kan lo bawhzui thin dawn nia,” tiin a chah a. “Sawrkar langtlang leh huapzo kan kalpui zelna lamah he application hian min tanpui thei dawn a. District dangah pawh kalpui thei ila a duhawm khawp ang,” a ti a. Mipuite chu he Application thar hi tangkai taka hmang tura sawmin, sawrkar leh mipui thlunzawmna tha tak siamtu leh Bialtu MLA tan pawha tangkai tak tur a nih thu a sawi bawk.

Chief Minister chuan hmanlai chuan Miz te kan Communication System ala hniam hle thu sawiin, “Tunlai khawvel hmasawnna chak tak hnuaiah chuan AI khawvelah kan chuangkai ta a, Chief Minister Office-ah ‘Mipui Aw App’ kan nei a,Mipui atanga Complaint kan dawn chu a tam zawk solve a ni tawh a, Online hmangin Handholding App te, E-Ram te leh E-Office te chak taka kalpui chhoh mek zel a ni,” a ti bawk.

Nimin-a Vantlang Viltu Mobile Application tlangzarhna hun hi Serchhip Addl. DC Lalrinzuala chuan kaihruaiin Serchhip Bawrhsap Paul L. Khuma chuan he Application an siam chhan leh a hman dan te tarlangin SDC Vanthangpuia chuan kalkhawmte chu hman dan a zirtir nghal a. He Application kaltlang hian mipuiten dan phal loh a tuichhe paih, kawngpui tihnawk, bawlhhlawh paih leh halral, damdawi rui leh hralh, kangmei chhuak, vanduaina, transformer chhia leh electric kaihhnawih harsatna, Traffic Rules bawhchhia, Tui connection lama harsatna ang chi te, mipuiten nitin nuna harsatna an tawh sawrkarin a hriat vat ngai chi zawng zawng te pawh an hrilh zung zung thei dawn a ni.