Private damdawi In 13 ten MUHCS zawm tawh

Mizoram chhunga Private damdawi In awm zawng zawng atanga 40% velin Mizoram Universal Health Care Scheme (MUHCS) an zawmfel tawh.

MUHCS hotute chuan Private damdawi In thenkhat he Scheme la zawm lo te chu mipuiten harsatna an tawh mek hrethiam a, MUHCS hnuaia mipui tana inziaklut turin an ngen a, dinhmunah Mizoram-ah hian Private damdawi In 32 awma hriat a ni a, nimin thlengin Private damdawi In 13 te chuan MUHCS hi zawm tawhin, hei hi Mizoram-a Private damdawi In awmg zawng zawng atanga chhutin 40.62% a ni. Tun thlenga MUHCS zawmtu Private damdawi In te hi Aizawl-ah damdawi In paruk- Nazareth Hospital, Chaltlang; Nazareth Hospital, Ramhlun North; JC Eye Hospital, Bungkawn; Vohbik Day Care (Dialysis Centre) Salem Veng; Rapha Day Care (Dialysis Centre) Zarkawt leh 360 Multisuperspeciality Clinic & Dialysis Centre, Bazar Bungkawn te a ni a, heng bakah hian Lunglei-a damdawi In pahnih, Christian Hospital Serkawn leh Faith Hospital; Lawngtlai-ah Christian Hospital leh LCMC Lawngtlai; Siaha-ah Maraland Gospel Centenary Hospital leh Champhai-ah Med AIM Hospital leh DM Hospital Champhai te a ni.

Hetihlai hian MUHCS hmang thei tura inziahluhna hun chu hawn mek niin ruahman lawk ang chuan June thla chhung hian Sub-Centre ah emaw, Online hmangin emaw inziahluh theih a ni a. July thla-ah inziahluhna hun hawng lovin August thla a inziahluh leh theih a ni anga, August thla ah erawh hi chuan inziahluh man hi a man pangngai aia zaa 50 (50%) in a sang tawh dawn thung a ni.