MZP in June 30-ah Remna Ni 2025 an hman leh dawn thu an sawi

Mizoram-in a remna leh muanna a neih champhaphak vawi 39-na, ‘Remna Ni 2025’ chu June 30 khian Mizo Zirlai Pawl (MZP) chuan Aizawl-a Lammual-ah hman leh an tum.

Remna Ni hman tur chungchang ah hian Inrinni khan MZP General Hqrs. hruaitute chuan Aizawl-a MZP Pisa-ah thuthar thehdarhtute kawmin Remna kan neih hi kum 39 lai ral tawh mah se a hlutna a la ngai reng tih sawiin, “Kum 20 teh meuh hreawm leh harsa taka Mizo mipuite kan awm hnuah Mizo mipuite tawngtai chhuah a nih avangin theih ang tawka lawm hi a phu a. Zirlaite phei chu a hlut zia leh Mizote hun pawimawh a nih zia kan inhrilh thar zel a tul takzet a ni,” an ti a. “Remna Ni hi Mizo mipuite tana hun pawimawh em em, lungrual taka lawm ho tur ni mah se; a bik takin political party-te ngaihdan a inang lo fo a. Remna Ni-ah kan inhnial nasa thin hle a. Hun pawh kan hmang ho hlei thei lo a ni ber. Chuvangin MZP chuan hei hi a vei hle a, political party awn lam nei lo Zirlai pawl chuan kum 2018 atangin kumtin Remna Ni hi a buatsaih ta ziah mai a ni,” an ti a. MZP buatsaihna hnuaiah Party hrang hrangte pawhin lungrual takin hun kan hmang ho thei ta zel tih sawiin, “A hun laia Sawrkarna fawng chelhtu apiang an in ti neitu lo thei lo a. MZP chuan lawmawm a ti hle a. Hun lo kal zelah pawh Remna Ni hi Mizo mipuite. lungrual takin hmang ho zel thei ila tih hi a duhthusam a ni,” an ti.

MZP chuan kumin June 30-a Remna Ni hman turah hian Chief Minister Lalduhoma chu Khuallian a nih dawn thu leh School hrang hrangin Cheraw kanin, zai leh lam leh thusawi bakah lemchan te entir a ni dawn tih an sawi a. Mizo mipui zawng zawng he hun hmang tur hian sawmin, sawrkar mi pawimawh, NGO hrang hrang, Kohhran hrang hrang, zirna In zawng zawng leh Politicial Party tinte he hun hmang tur hian an sawm thu an sawi bawk a. Hei bakah hian Zoram mipuite chu Remna Ni puala Pathian hnena remna avanga lawmthu sawi tawngtaina nei theuh turin an ngen bakah Remna Ni puala Lammual-a hun hman turah hian tel theuh turin an sawm bawk a ni.

MZP General Hqrs. hruaitute chuan Remna Ni-ah hian remna atana thawhhlawk mi hrang hrang an lo chawimawi tawh thu sawiin, kum 2018-ah Lal Thanhawla, Laldenga leh Lalkhama (IAS Retd.), kum 2019-ah Rev. Dr. H.S. Luaia, Rev. Dr. Zairema, Rev. Dr. Lalngurauva Ralte leh Lalduhoma; kum 2022-ah Rev. Dr. Lalsawma; kum 2023-ah Mizoram Kohhran Hruaitute Committee (MKHC) leh kum 2024-ah JH. Rothuama, P. Lalupa, Lalthanzauva leh Ngurchhina te an nih thu sawiin, kumin ah erawh chuan chawimawina an pekchhuah dawn rih loh thu leh hun lo kalzel turah erawh chuan la sem zel tura ruahman a ni tih an sawi bawk.