August thla atang khian Serchhip-ah bawlhhlawh thliarhran kalpui tan tum a ni
Nimin khan Serchhip Bawrhsap Paul L. Khuma kaihhruaiin Serchhip DC Meeting Hall-ah Serchhip a bawlhhlawh sawngbawl leh thliar-hran dan tur ruahmanna sawiho a ni a, he huna tarlan a nih danin PHE, UD&PA leh Greenherd Pvt. Ltd. te tanhona in Serchhip leh Chhiahtlang-ah bawlhhlawh thliar leh sawngbawl kalpui a ni dawn ta a. Greenherd Pvt. Ltd te leh UD&PA te chuan bawlhhlawh lakkhawm leh paih hna an thawh dan her danglamin, chhungkaw tinte kawtkai-ah bawlhhlawh hi an lakkhawm sak thin anga. Bawlhhlawh tawih thei (Wet) leh tawih thei lo (Dry) te chu bawm hrangah dahin mahni In theuhah thliar hran tur a ni tawh ang.
Ruahmanna ang chuan July thla chhung hian bawlhhlawh thliarhran chungchanga mipui zirtirna uar taka kalpui a ni anga. Khawtlang hruaitute leh tlawmngai pawlte phungbawmah sawmin UD&PA Department chuan a bul an tum anga. July thla tawpah a tihchhinna (Trial run) neih hman tum a ni a. August thlaah New Serchhip North leh New Serchhip South VC huamchhungah a takin kalpui tan phawt tum niin Veng dangah pawh a tahtawlin kalpui zel a ni ang.
Greenherd Pvt. Ltd te chuan an bawlh-hlawh sawngbawlna hmun New Serchhip Lungrual ramah bawlhhlawh hi an lakhawm anga. Sawrkar dan zawm chungin mipui hrisel zawkna tur leh thianghlimna kawnga hma kan sawn theih nan bawlhhlawh mumal takin an tiral tawh dawn a ni. Serchhip District chu sawrkar leh mimal firm thawhhonaa bawlhhlawh sawngbawl hna mumal taka kalpui thei hmasa ber - Model District a nih theih ngei a beisei thu he hunah hian Bawrhsap Paul L. Khuma chuan a sawi bawk.
Nimin-a thutkhawm ah hian Serchhip District thuneitute bakah PHE Department, UD&PA Department, I&PR Department leh Greenherd Pvt. Ltd. aiawhte an tel a ni.
.jfif)
Comments
Post a Comment
I ngaihdan i sawi hian mipui ngaihdan i tarlang a ni!