Zorinpui thleng Rel kawng Preliminary Survey zo tawh

Mizoram Rajya Sabha MP K. Vanlalvena chuan Sairang/Sihhmui atanga Myanmar ramri a Zorinpui thleng Rel kawng siam tura ruahman chu Preliminary Survey zawh a ni tawh tih a sawi.

Rajya Sabha MP K. Vanlalvena hian Akashvani Aizawl a hrilh danin Sairang/Sihhmui Rel Chawlhhmun atanga Mizoram chhim tawp Myanmar ramri-a Zorinpui thlenga Rel kawng siam tura a lo ngen thin tawh chu chak zawka hmalak a nih theih nan tunhnai khan Railways Minister Ashwini Vaishnaw a sawipui nawn leh a. Sihhmui atanga Zorinpui Rel kawng siam tur hian Preliminary Survey zawh a ni tawh a, Map erawh Final a la ni lo deuh a ni, a ti. 

Rajya MP K. Vanlalvena chuan Ashwini Vaishnaw hnenah Bairabi leh Sairang inkar Rel kawng siam zawh a nih avangin lawmthu a hrilh a, Union Minister chuan a lawmpui thu a hrilh ve thung niin a sawi a. Sairang Rêl chawlhhmun hawn dan tur pawh an sawidun niin a sawi a. Technical thil la endik mek thenkhat a awm avangin Official a hawn programme hi siam a la ni rih lova, Railway Engineer lam te chuan kumin July ni 31 ralhmaa hawn theiha peih turin an insawi a. Rel lo lut tur hi enchhin a ni tawhin Sairang/Sihhmui Rel Chawlh-hmunah hian hlawhtling takin Rel hi a lo tlan lut chhin tawh a. A him leh him loh endiktu Commissioner of Railway Safety pawhin a him tawk a tih thu Ministry of Railways-ah thehlut tawhin, Ministry pawmpuina nghah mek a ni a. Prime Minister chuan he Rel kawng thar hi a hawng dawn nia sawi a ni bawk.

Survey an kalpui chhin atanga an chhut dan chuan Sairang Rel Chawlhhmun atanga Zorinpui thlenga Rel kawng siam tur hi kilometre 223-a thui a ni dawn a. Rel kawng hi siam a nih chuan Mizoram atanga Myanmar rama Sittwe Lawng Chawlhhmun thlenga kalpawhna tur Kaladan Multi-Modal Transit Transport Project (KMMTTP) nena kal thiang tur a ruahman a ni.