Russia MP leh Lok Sabha MP te an inkawm

Russia MP, Dmitry Kuznetsov chuan Mizoram Lok Sabha MP Richard Vanlalhmangaiha chu New Delhi-a a chenna In-ah a kawm.

Russia MP Dmitry Kuznetsov hi BRICS Forum aiawh in India sawrkar mi pawimawh te nena thil chi hrang hrang sawiho tura lo kal a ni a. Nimipiah tlai khan Lok Sabha MP Richard Vanlalhmangaiha a chu New Delhi-a a chenna ah a kawm a. Mizoram MP chuan Mizo thalaite Russia rama hna an thawh ve theihna tur kawng te sawipuiin theihtawp chhuahpui turin MP hi alo ngen bawk a ni. Russia MP pawh hian Mizoram chu a rawn kal leh huna tlawh ve ngei a duh thu leh kawng chi hrang hranga hma lakpui a inhuam thu a hrilh bawk a ni.

Dmitry Kuznetsov hian Richard Vanlalhmangaiha chu BRICS Forum Convention Brazil khawpui Rio Di Janeiro September ni 15-17 chhunga neih turah tel ve ngei turin a sawm a. BRICs Forum hi ram panga inzawmkhawm (Brazil, Russia, India, China leh South Africa) niin an ram hming bul zel lakhawmin pawl hmingah an hmang ta a ni. BRICS hi platform hrang hrang insumdawn tawnna te, politics lam thilte, humanitarian ground leh adang dang ah te inhmukhawm thin in, ram hrang hrang ah Convention te an buatsaih thin a. Kumin September thla hian Brazil-ah 'Traditional Value' tih thupuia neiin Convention hi an buatsaih dawn a ni.