Mizoram Police hnathawh dan thlirletna Home Minister hovin neih a ni

Mizoram Police hnathawh dan thlirletna chu nimin khan Mizoram Police Headquarters (PHQ) Khatla-a DGP Conference Hall-ah neih a ni a, Home Minister K. Sapdanga chuan a talpui a ni.

Mizoram Police hnathawh dan thlirletna hunah hian Director General of Police (DGP) Mizoram Anil Shukla chuan inlawmna thu sawiin, Home Minister K. Sapdanga chuan mipui vantlang venghim tura mawhphurhna pawimawh tak chelhtu Police Department hna lo thawh tawh dan chu lawmawm a tih thu a sawi a, hmasawnna nasa zawk a awm theih nan dan leh thupek kenkawh hnathawktu ten taksa leh rilru hrisel nei zel tura an inenkawl that a pawimawh thu a sawi a. Thawktu tha an awm belh deuh deuh theih nan dik leh langtlang takin, a tling leh phute chauh lak an nih theih nan Constable 259 lakna pawh kalpui a nih thu a tarlang a. Heti chung hian Police Department-ah post hnawkhat loh awm zat chu za zelah 38.9 a nih thu a sawi bawk.

Home Minister chuan Police Department hnuaia thawktu, chhan hrang hrang avanga an mawhphurhna hlenchhuak thei lo harsatna neite chu 'Voluntary Retirement' hmanga chawlh tir mai a tul tur thu a sawi a. Khawvel changkanna in a ken tel thiamna avangin inbiakpawhna kawngah te hmasawnna nasa tak a awm tawh thu sawiin, hemi avang hian MPRO a thawktute pawh mipui tan tangkai zawka chhawr an nih theih nan a tul anga duty pek tura ruahmanna siam a tul thu a sawi bawk.

Mizoram-a Police Station hmasa ber chu kum 1895 khan din a ni a, kum 1947-ah Police Station 6, Aizawl, Lunglei, Siaha, Kolasib, Champhai leh Tlabung-ah din phalna hmuh leh a ni a. Kum 1973 khan 1st Mizoram Battalion Armed Police din leh niin tun dinhmunah Mizoram Police hi District 11, Armed Battalion 3, India Reserved Battalion 5, Police Training School 1, Traffic Unit 1, Security Unit 1, Intelligent Unit 3 leh Mizoram Police Radio Organisation (MPRO) 1 a awm mek a ni. Mizoram Police hnuaiah hian Sanctioned Post 12,189 zinga 7,685 chu hnawhkhah a ni a, heng zinga 158 chu Gazetted Officer an ni a, Un-Armed ah 2,409, Armed-ah 4,424, Ministerial Staff-ah 179, Stenographer-ah 23, Computer Operator-ah 8 leh MPRO-ah 484 an awm mek a ni.

Mizoram Police hnathawh dan thlirletna hunah hian Mizoram Police tihchangtlun leh thawmthatna tura rawtna hrang hrang lutte ngaihthlak a ni a. Chung zingah chuan Police Sub-Division, Police Station, Police Outpost leh Police Beat Post thar siam rawtna te, ramri-a Border Police Station siam belh tura rawtna leh Border Outpost awmsa thawmthat dan turte sawiho a ni a. Police hmunhma hrang hrang thawmthat dan tur leh Police-te taksa hriselna vawngtha tura ruahmanna kalpui dan turte sawiho a ni bawk.