YMA Sub-Hqrs. in CM hnenah an lo thlen

Sub-Hqrs. YMA Serchhip hruaitute chuan nimin khan Chief Minister Lalduhoma hnenah Serchhip khawtlang tana pawimawh hrang hrang an thlen.
Sub-Hqrs. YMA Serchhip hruaitute hian Serchhip-a rawn zin Chief Minister leh Bialtu MLA Lalduhoma chu nimin zing khan PWD IB-ah lo hmuin Serchhip-ah Addl. District & Session Judge an awm loh avanga harsatna an tawh thin sutkianna tura hma an lo lak tawhna ah sawrkar in Circuit Court hawnga thla tin Chawlkhar khat chhung Addl. District & Session Judge hi thu tura a ti chu lawmawm an tih thu an sawi a. Amaherawh chu nikum November thlaa hriattirna tihchhuah a nih hnuah Circuit Court hi tum khat chiah hawn ala nih thu leh harsatna an tawh thin chu sutkian ala nih loh thu sawiin, Serchhip-ah hian a ngheta Addl. District & Session Judge hi dah turin an lo ngen a ni.

Hei bakah hian Serchhip Bazar-a Police Beat Post chu hun rei tak a function mumal tawh loh avanga mipuite tana harsatna awm pawh Chief Minister hnenah hian lo thlenin, Chief Minister hian Serchhip SP chu a tul anga hma lo la turin a hrilh nghal a. Serchhip-a District Social Welfare Officer (DSWO) hawn tawh mumal zawka a kal theihna tura ngenna pawh lo thlenin, Thenzawl leh Zote South inkar kawng Alkatra (Bitumen) hmanga Seal Coat sak turin an lo thlen bawk.