MZP Hqrs. Serchhip in zirlai tithate leh Civil Service tling thar pathum te an chawimawi

Mizo Zirlai Pawl (MZP) Hqrs. Serchhip chuan kumin-a HSLC, HSSLC leh MPSC exam-a tithate lawmpuina hun nimin khan buatsaihin Serchhip Bialtu MLA leh Chief Minister Lalduhoma chuan khuallian niin a hmanpui a ni.
Serchhip DC Pisapui Hall-a zirlai tithate lawmpuina hunah hian Chief Minister chuan zirlai hlawhtling, chawimawina dawngtute chu lawmpuiin, “Harsatna tam tak paltlangin in bei hram hram a. In thawhrim rah tha takin in seng ta a ni. In kal zelna turah pawh taima taka in beih chuan hnehtu in ni zel ang tih hi ring tlat ang che u,” tiin an kal zelna turah duhsakna a hlan a. Naupang Exam zawng zawng pass-tir thei School te pawh lawmthu hrilhin, an thawhrimna chu chhungkaw tam tak tan malsawmna a lo chang ta tih a sawi. Chief Minister chuan, “Hmanni lawkah Govt. Serchhip College-a thawklai zirtirtu pathum ten Doctorate Degree an la thar a, Social Media-ah lawmpuina ka lo nei tawh a. Kumin ah HSLC Topper kan nei a, Distinction a pass engemaw zat kan nei a. HSSLC-ah kan naupang ten an titha viau a, zaa za pass School panga kan nei a. MPSC Topper leh MPS pakhat leh MIS pakhat kan nei bawk a. Kumin hi Serchhip tan zirna lamah kum tha a niin ka hria,” tiin “Hman ni lawkah Mizoram chu Fully Literate State-ah kan inpuang a, hun rei tak atang tawhin Serchhip District chu India rama District Level-a Literacy sang ber kan ni thin. Zirna kan uar a, lehkhathiam tam tak neih hi kan inhmeh a ni,” a ti.

Chief Minister chuan Hhuman Resource Development lama sawrkar hmalakna langsar te tarlangin, Mizoram Engineering College chu zirna kalpui thuai a nih tur thu te, Mizoram State University nei tura hmalakna te, NIT Mizoram hmasawnna tura hmalakna te, ITI tichangtlung tura hma an lakna te a tarlang a. “Kan thalaite hi a theiin sawrkar hna thawk se, a theiin company-ah hna thawk se. A thei chuan rampawnah hna thawk se, a titheiin sumdawnna leh thilsiamna te din se. Mahni zawnah theuh ram leh hnam tana thawkchhuaktu ni vek thei ila tih hi kan hmathlir a ni,” a ti.

MZP in zirlai titha an chawimawina hunah hian HSLC Exam-a Topper PC. Lalthakimi bakah Distinction-a pass mi 43 te; HSSLC Exam-a Distinction-a pass mi pathum leh HSLC Exam-a zirlai Exam pass vek School 5- Govt. PCR H/S, New Serchhip Secondary School, Marian H/S, Goodwill English Academy School leh PES te hnenah chawimawina hlan an ni a. Hei bakah hian Civil Service tling thar pathum Samuel Malsawmzuala (MCS Topper) R. Vanneihtluanga (MIS) leh Lalthlamuana MPS te hnenah chawimawina an hlan bawk a. He hun hi MZP Hqrs. Serchhip Vice President Lahlimpuia chuan kaihruaiin Bawrhsap Paul L. Khuma leh MZP General Hqrs. President H. Lalthianghlima bakah MZP Hqrs. Serchhip President Darchhuana te pawhin thu an sawi a ni.