Mizoram-ah khualzin te hipna tur ruahmanna siam

Prime Minister Narendra Modi kaihhruai sawrkar kum 11 chhunga hmalakna hrang hrang zingah Mizoram-ah pawh khualzin hip kawngah ruahmanna engemaw zat siam mek a ni.

Tourism Department Director R. Lalrodingi’n Akashvani Aizawl a hrilh danin Prime Minister Narendra Modi kaihhruai NDA sawrkar hian Swadesh Darshan 2.0 hnuaiah Champhai a Keilungliah tuikhuah cheina atan leh Champhai District-ah tho Heritage & Cultural Centre dinna atan cheng vbc. 80 chuang a rawn pe a, hei hi tangkai taka hman tura ruahman a ni a. Central sawrkar chuan hmanlai pi leh pute huna lung a milem ziah tam tak awmna Vangchhia khua a Kawtchhuah ropui, mi tam takin an tlawh thin chu a tlawhtute tana remchang leh awlsamna tur (public amenities) siamna atan cheng vbc. 5.02 a rawn pe bawk niin R. Lalrodingi chuan a sawi bawk.

Tourism Department Director chuan MLA 40-te chu an Bial chhunga khaw pakhat theuh enkawl bik tur thlang (adopt) tura tih an nih thu a sawi a. ZPM sawrkar Flagship Programme ‘Bana-kaih’ sum hmangin heng khuate hi chei tur a nih thu a sawi a. An khaw thlante mamawh ang hi Tourism Department chuan a zirchiang mek zel a, an zirchianna behchhanin ruahmanna an siam dawn niin a sawi bawk.