Thil zuartute an lungawi lo

Aizawl Venghlui leh Tuikual South huamchhung a kawngkama thilzuar thin ten Inrinni khan Aizawl Tennis Court kawtah kawngpui dangin Aizawl Municipal Corporation (AMC) chunga an lungawilohna an lantir.

AMC hian Inrinni zing khan kawng dunga chawhmeh zuarte hi zing dar 10:00 hma lama insengfel turin an ti a, mahse an inseng fel hman lo a. Hemi hnuah hian AMC thuneitu lam hian an thil zawrhte hi lakkhawm sakin an phurh chhuah sak a ni.

Hemi hnu hian helai hmuna chawhmeh zuartute hi an lungawi lo zui a, lungawi loh lantir nan Aizawl Tennis Court bulah hmun hnihah kawngpui an dang zui a. AMC thiah phutin an aurual a, thu tura an tihna hmun AMC Multi Complex Tuikual South-ah motor a din zel avangin awmna hmun mumal an neih loh thu an sawi bawk. Police lam sawi danin, kawngpui hi chawhma dar 10:00 vel atanga dan tan a ni a, tharum thawhna erawh a chhuak lo thung a, tlai dar 5:00 hnu lamah an inzuar leh tan nia thudawn a ni bawk.

Tennis Court Chawhmeh Zuar Welfare hotute chuan AMC hotute’n Aizawl Veng danga chawhhmeh zawrhna- Chanmari, Mission Veng, Bawngkawn leh Khatla te pawh ualau taka an inzawrh chhunzawm theih laia Tennis Court bawr vela mi chauh an bungrua man sak an ni chu an hriatthiam loh thu an sawi a, AMC Multi Complex chu a len tawk loh bakah Inrinni tin an thutna hmun tur pawhchawp zel a ngaih avangin an tan harsatna a thlen tih an sawi a. Multi Complex Seat chu Tender hmanga chhan vek a nih avangin an awm loh lai chauha an tan inzawrh theih a nih thu an sawi tel bawk.

Kumin March ni 17-a Aizawl Treasury Bazar a kan hnuah Bazar-a thu te thutna hmun sawnchhuak turin AMC hian hma a la a, AMC Multi Complex Building, Tuikual South-ah an thutna hmun tura ruahman sakin hei hi thilzuar te chuan an duhloh thu an lo sawi tawh a ni.