Raltlan te avanga harsatna awm loh nan hmalak tum

Serchhip-a Thlasik thlai chingtu pawl, Serchhip Agriculture and Horticulture Cooperative Society Limited chuan raltlan te avanga Thlasik thlai chingtu ten harsatna an tawh lohna turin hmalak an tum thu an sawi.
Serchhip Agriculture and Horticulture Cooperative Society Limited hian nimin khan Darnam YMA Hall-ah Assembly vawi 12-na chu an Chairman, Lalramthara kaihhruaiin an nei a, an thurel zingah ramdang atanga raltlan rawn lut ten an duh duha Nul an siam leh ram te an nei chu nakin zelah a ram neitute tana harsatna thlen theitu leh thil him lo nia an hriat avangin a tul anga hmalak nise an ti a. Serchhip Bialtu MLA in MLA Fund atanga an mamawh ang Zikhlum chi a pe thin chu lawmawm an tih thu sawiin, kumin ah pawh an mamawhna hi Bialtu MLA hnenah thlen leh nise an ti a. Hei bakah hian Mat Phai Vaivenga Zau panna kawng chu PCC-a chhun a nih theihna turin hmalak nise an ti bawk.

Serchhip Agriculture and Horticulture Cooperative Society Limited Assembly-ah hian chawhnu lamah District Cooperative Officer C. Vanlalhruaia chuan Society kalphung leh a tangkaina te zirtirin he huna kal te hi Bawngtuthlawh an sem vek a. An Society-ah hian Member mi 200 vel awmin Assembly-ah hian mi 120 vel an tel a ni.