UD&PA Department hotu ten Serchhip an rawn tlawh

UD&PA Department hotute chuan nimin khan Serchhip rawn tlawhin District thuneitute nen Serchhip-a bawlhhlawh sawngbawlna tur ruahmanna chungchang an sawiho.

Serchhip tlawha rawn kal UD&PA Department hotute hi Secretary Lalmalsawma, Director Jacob Lalawmpuia, Joint Director (Admin) C. Lalduhzuali, Under Secretary Vabeimozachhi Chozah leh midang te niin Serchhip DC Meeting Hall-ah District thuneitute nen an inkawm a, UD&PA Secretary chuan District Beautification Committee hmalakna, Department hrang hrangte nen an thawhhona te leh ruahmanna an siam te chhuanawm a tih thu a sawi a. Bawlhhlawh sawngbawl kawngah pawh Model District an nih ngei a beisei thu a sawi a. Serchhip DC Paul L. Khuma chuan Serchhip District hmalakna hrang hrang sawiin, a hmunah hmuhpui tura UD&PA thuneitute an lo kal chu lawmawm a tih thu leh District tana hmasawnna thil tam tak a thlen phah ngei a beisei tih a sawi bawk.

Serchhip-ah hian UD&PA Department hmalakna in Solid Waste Management Centre sakna tur ruahmanna a kal mek a. Hetihlai hian PHE, Serchhip District Urban Development Office leh mimal firm Greenherd Pvt. Ltd. te thawhhona in Serchhip Lungrual ramah bawhhlawh sawngbawlna hmun sak mek chu peihfel tep a ni tawh a. Hemi chungchanga Private Company lamin harsatna an neih te he hunah hian sawiho a ni a. Serchhip UD&PA Office te nen an thawhho dan tur ruahmanna te, Greenherd lamin sawrkar lama beiseina an neih te an sawiho a ni.

Hei bakah hian District Beautification Committee hmalakna powerpoint hmanga sawifiah a ni bawk a. Meeting neih zawh hian NH-02 kawngpui kamah UD&PA hotute hian Palm thing an phun nghal a. Serchhip Auditorium, District Hospital tur sak mek, Helipad bula Community Park siam mek leh UD&PA Department Office te an tlawh bawk a ni.