Chief Secretary hovin Mizoram-a PM Vishwakarma Scheme kalpui dan thlirletna hun hman a ni

Nimin khan Chief Secretary H. Lalengmawia hovin Mizoram-a PM Vishwakarma Scheme kalpui dan thlirletna neih a ni.

PM Vishwakarma hi Central Sector Scheme niin September ni 17, 2023 khan kalpui tan a ni a. India rama kutthemthiam (Artisans and Craftsmen) tihhmasawnna leh khai-chhuahna tura duan niin he Scheme hi Ministry of Micro, Small and Medium Enterprises (MoMSME), Ministry of Skill Development and Entrepreneurship (MSDE) leh Department of Financial Services (DFS), Ministry of Finance (MoF), Govt. of India te thawhhona hnuaia kalpui ruahman a ni.

Chief Secretary’s Conference Hall-a he hmalakna thlirletna hunah hian he ruahmanna hnuaia tanpuina dil tura inziaklut te loan lak atanga a pung rulh tur zat ngaihdam (interest subvention) leh Bank nen a inthlunzawnna tha siamsak (credit linkage) bakah tha zawk leh chak zawka District tinah Skilling leh Training kalpui dan tur rel a ni a. Thutkhawm kaihruaitu Chief Secretary H. Lalengmawia chuan PM Vishwakarma Scheme a lo hlawhtlin lehzual nan Deputy Commissioner tin te chu ngun tak leh ngawrh taka District Implementation Committee kaltlanga hma la turin a chah a. Local Council leh Village Council te nen tha taka thawk ho zel turin a chah bawk.

PM Vishwakarma thiltum zingah hian Kutthemthiamte thiamna hriatpuia, he Scheme hnuaia hamthatna awm te hmang thei tura tanpui te; Tunlai khawvel mila an thiamna te belhchhah te; An theihna leh thilsiam quality belhchhah tura tanpui leh hnathawhna hmanraw changkang zawk ngaihtuah sak te; Dahkham awm lo leh a punna hniam zawka loan awlsam taka an lak theihna tura tanpui te; Digital transaction an hman tam theihna tura ruahmanna siamsak leh an thilsiam-chhuahte hralhchhuahna kawnga tanpui te a ni a. State pumah dilna lut 10,740 awmin Stage-I a pawm 7900; Stage-II a pawm 7269 leh Stage-III a pawm 3297 te a awm a ni.

PM Vishwakarma Scheme-ah hian dilna te enfiah leh pawmpui turin endikna hrang hrang chi thum (3) paltlang a ngai a, Stage-I ah Village Council President emaw, Local Council Chairman in PM Vishwakarma portal-a inziaklut te chu Online-a thliarfelin, an finfiah thin a. Stage-II ah VCP/LC Chairman emaw in dilna an enfiah te chu online in District Implementation Committee hnenah thawnin an recommend leh thin a. Stage-III ah Screening Committee in an pawm leh thin a, Serchhip, Lunglei leh Khawzawl District te chu Mizoram chhunga PM Vishwakarma Scheme hnuaia registration nei tha zual te an ni.