Jail Warders training ten Passing Out Parade an nei

Prison Department hnuaia Jail Warders te tana Basic Training Course Training Batch 14-na chu zawhfel niin nimin khan Passing Out Parade neih a ni a, Home Minister K. Sapdanga chuan a hmanpui a ni.

Central Training Institute (CTI), Sesawng-a Passing Out Parade-ah hian Home Minister chuan Training chu service atan chauh ni lovin ni tin midangte nena khawsak hona thlenga a pawimawh thu a sawi a. Uniform ha thinte zahawmna sawiin, Uniform hak hian dan leh thupek zawmtu an nih tih a lantir a, chuvangin zaha, ngaina tur leh uluk taka vawng fai thin turin a fuih bawk. Hei bakah hian Home Department chhunga Uniform Cadre hrang hrangte dinhmun chawisana, tih zahawmna tur thil tam tak duan mek a nih thu sawiin, ram ven hna thawktute tan thahnem ngai takin Sawrkar pawh a inbuatsaih thu a sawi a. Warder-te chu ram leh hnam tana thawk an ni tih hre renga, rinawmna leh dikna nena hna thawk thin turin a chah bawk.

Basic Training hi April ni 26, 2025 atanga neih tan niin thla hnih (2) chhung neih a ni a. Warders training chhuakte hi an vaiin mi 29 niin mipa 18 leh hmeichhia 11 an ni a, nimin vek khan CTI a Commandent Lalrengpuia chuan rinawm tura intiamna (oath taking) a neihpui nghal a ni.

Nimin-a he hun hman ah hian Training neih chhunga titha bik mi panga thlanchhuahte hnenah Home Minister chuan lawmman a hlan nghal a, Home Minister Award for Best All rounder-ah Female Warder Lalrinawmi; Home Secretary Award for Best Drill-ah Warder Lalrinliana; IG Prison Award for Best Firer-ah Warder Lalnunkima; Commandant General Award for Best Discipline-ah Warder F Lalrinmawia leh Commandant CTI Award for Best Turn Out-ah Warder RC. Lalzarmawia lawmman hi hlan a ni a. Home Minister hian CTI Sesawng hmunhma te a tlawh nghal bawk a ni.