Inremna nei thuai turin duh

Mizoram Pradesh Congress Committee (MP-CC) Treasurer Dr. Lalmalsawma Nghaka chuan nimin khan Aizawl Press Club-ah thuthar thehdarhtute kawmin April ni 1 atang khan Mizoram sawrkar chuan Mizoram Universal Health Care Scheme (MUHCS) pawisa pe lo (Cashless)-a Damdawi In-a inenkawl theihna chu a kalpui tan ta tih sawiin, he Scheme hi Chief Minister in March ni 19 khan a hawng tih an sawi a. “He Scheme hi Scheme tha tak mai, mi harsa zawk te tan phei chuan ‘a aia tha a awm chuang lovang’ tih tur a ni,” tiin amaherawh chu sawrkar in hetiang Scheme tha tak kalpui a tum dan hi a fuh lo hle-a an hriat thu a sawi a. “He Scheme mumal lo taka kalpui a tum hi ZPM sawrkar hian ngaihtuah tha leh se, Private Hospital te nen inremna neihpui thuai thuai se, hlawhtling takin kal se tih hi kan duhdan a ni,” a ti bawk.

Hetihlai hian nimin khan Health Secretary H. Lalengmawia kaihhruaiin Mizoram sawrkar aiawhte leh Non-Government Hospital Association of Mizoram (NGHAM) hruaitute chu MUHCS chungchangah an thukhawm a, he Meeting hian NGHAM hnuaia Private Hospital ten MUHCS chungchangah sawrkar-a rawtna an neih te leh an duhte ziakin thlen se, inremna kawng a awm theih nan inbiak chhunzawm zel nise an ti bawk.