MZP in Mizoram Polytechnic-ah hmalak zel an tum

Mizo Zirlai Pawl (MZP) Hqrs. chuan, Mizoram-a Diploma Engineer zir theihna hmasa ber - Mizoram Polytechnic Lunglei chu Court order-a a vawi hnihna atana kalhsak leh an ni chu pawi an tih thu an sawi.

MZP Hqrs. Lunglei chuan Mizoram zirna In pawimawh ber pakhat - Mizoram Polytechnic Lunglei buaina chungchanga sawrkarin hma a la chak tawk lo leh buaina chingfel tura huntiam pek chhung pawha thuneitute lam atanga ngaihven a hlawh lo chu pawi an ti tih sawiin, zirlai tam takin an tuar hmaa hma la vat turin Mizoram sawrkar chu an ngen a. Mizoram Polytechnic Lunglei hawn a nih leh vat theihna atan theih tawp chhuahin, a tawp thlengin hma an la chhunzawm zel dawn a ti.

Lunglei-a Mizoram Polytechnic ram luah man hi kum 1992 atang khan pek a ni lo a, Lunglei District Court chuan Mizoram sawrkar chu Rs. 88,33,268/- chawi turin a ti a, Mizoram Polytechnic Principal Lalnuntluanga chuan Higher & Technical Department chuan Finance-ah sanction turin a dil mek tih a sawi a ni.