Samvidhan Hatya Diwas (Constitution Murder Day) chu Chief Minister hovin Mizoram-ah hman a ni

Sawrkar Laipui-a Ministry of Culture bultumin nimin, June 25, 2025 khan ramchhungah ‘Samvidhan Hatya Diwas’ (Constitution Murder Day) hman a ni a, Mizoram-ah pawh Chief Minister Lalduhoma hovin he ni hi hman niin Chief Minister chuan Democracy tundin leh ram Danpui humhalh a tulzia hriat thar nan he ni hi hman a nih thu a sawi a ni.

Sawrkar laipui chuan nikum khan June ni 25 chu ‘Samvidhan Hatya Diwas’ atana hman turin a puang a. He ni hi June ni 25, 1975-a India ram sawrkarin Emergency a puan hmanga India ram a tihchhiat hriatrengna puala hman tura tih niin um 1975 June ni 25 khan khatihlaia India Prime Minister, Indira Gandhi chuan ‘Internal Disturbances’ chhuanlamin Article 352 hnuaiah Emergency a puang a. Hei hian thla 21 zet awhin kumin hi a kum 50-na cham a ni a, kumin hian ‘Samvidhan Hatya Diwas’ (Constitution Murder Day) atan hman a ni ta bawk a ni.

Art & Culture Department bultum-a Vaivakawn Cultural Centre-a he ni puala hun hman ah hian Chief Minister Lalduhoma chuan Samvidhan Hatya Diwas chu Politics-a inbeihna hmanrua te pawh a ang thei tih sawiin, “Nimahsela, keini chuan Democracy tundin leh ram Danpui humhalh a tulzia hriat thar nan kan hmang a ni,” a ti a. India Danpui hnuaiah kan Hnam leh Sakhuate humhimna fel tak a awm thu sawiin, “ILP kan nei bawk a, ‘India sawrkar hnuaiah hian Zofate hi kan him a ni’ tiin ka sawi thin a. Article 371G-ah kan inhumhimna (Special Provision) fel taka dah a ni a, Eastern Bengal Frontier Regulation Act 1873 hmangin Inner Line Regulation leh Non-Tribal ten kan ramah ram an neih ve theih lohna a awm bawk a. Danpui in min humhim tlat avang leh democracy lungphum, Zalenna kan neih avangin he ramah hian kan him a ni, kan ti mai a ni,” a ti a. “Kan himna leh him lohna chu kan Danpuiah a innghat a. He Dan hi palzut a nih chuan engkim a lo derthawng nghal mai ang. Tin, 6th Scheduled, kan tana tha em em kha kan ADC pathumah chauh a lo nung ta si a. Tihnun thar leh a tha lawm ni tia inrawnkhawm te hi a tha hialin ka hria,” a ti.

Chief Minister chuan ram Danpui chu tihdanglam theih loh a ni lo tih pawh sawiin, “Vawiin thlengin vawi 106 vel Amend tawh a ni. Amend theih Danpui a nih miau avangin a tha zawnga hman theih a ni a, kum 1975-a Emergency puanna thu ‘Internal disturbance’ tih pawh ‘Armed Rebellion’ tia thlak (Amend) niin a tha em em a ni. Amaherawh chu amend theih a nihna hi a chhe zawnga hmang duh Ruling party an lo awm erawh chuan kan himna hi tihchhiat theih a ni,” a ti a. “Tuna sawrkar mek hian kum 1975-a Emergency lo puan tawh ang kha an duh lohzia lantirna he Diwas hi a hmang a ni a. Kan ram Danpui leh democracy tundin an duhzia an tilang a ni. Chutiang rilru pu an nih avang chuan ngaih-ngamin kan awm thei ang. Amaherawh chu kan mit leh beng kan chhit reng erawh chu a ngai thung. Kan zirlaite leh thangthar ten kan ram leh hnam himna hi engtik lai mahin kan ngaihthah tur a ni lo,” a ti bawk.

Mizoram-a Samvidhan Hatya Diwas puala hun hman ah hian khual zahawm Art & Culture Minister C. Lalsawivunga pawhin India danpui chu kan rama dan chungnung ber a ni tih sawiin, “Sawrkar lam leh mipui lam atangin mawhphurhna a awm ve ve a. Kan Danpui hnuaia kan mawhphurhna te tha taka kan zawm a, hnam tinte him tak leh inngeih taka kan awm dial dial hian kan ram hi a mawiin a lo ropui zual a ni,” a ti bawk.

Nimin-a he hun hman ah hian Art & Culture Department changtu Secretary Zodingpuii chuanh inlawmna thu sawiin, he ni hmang tura sawrkar laipuiin a duh dan te a sawifiah bawk a, he Diwas hi kum khat chhung hman tura ruahman a ni.

Samvidhan Hatya Diwas hi June ni 25, 1975-a Emergency puan hriatrengna leh Emergency puan laia nunna chan leh mi tam tak tuarna hriatpuina ni-ah hman a ni.