CSR chungchang inhrilhhriatna hun buatsaih

Mizoram-a NGO leh Corporate Social Responsibility (CSR) Implementation Agency-te hnena CSR chungchang inhrilhhriatna hun chu nimin khan Aizawl-a I&PR Auditorium-ah neih a ni.

CSR Cell, Govt. of Mizoram leh Confederation of Indian Industry (CII) tangkawp buatsaih CSR chungchang inhrilhhriatna hun hi Adviser to CM leh Mizoram CSR Cell Chairman TBC. Lalvenchhunga chuan hmanpuiin CSR lama hmasawnna tura sawrkar hmalaknate a tarlang a. CM Office hnuaia CSR Cell chu mipuite hamthatna atana thawktu, NGO leh CSO-te puibawmtu tur atana din a nih thu a sawi a. CSR hmanga sum dawng tur leh hmang tangkai tura mamawh chi hrang hrangte hriatchian theihna atana mithiamte thiamna chhawr tangkaia he inhrilhhriatna hun a thlawna buatsaih a ni hi lawmawm a tih thu sawiin, Mizoram-ah ngei CSR Conclave neih a nih thuai theih a beisei thu leh AI hmanga donor leh implementation agency-te tuahrem theihna an buaipui mek thu a sawi bawk.

CSR Cell, Govt of Mizoram leh CII-te tangkawpin an buatsaih Workshop-in a tum ber chu NGO-te hnena CSR chungchanga dan awmte zirtir leh Corporate-te nena an indawr theih nana puibawm a ni a. An tana thupui tangkai tur – dan zawm tura mamawh te, inrelbawl dan entawntlak te, sum hmuhchhuah theih dan te leh dilna ziah dan te zirho a ni a. A taka an kalpui theih nan tihchhinna hun (mock pitching exercise) pawh an nei ang.