Server host-na Google Virtual Private Server-ah sawn

Mizoram sawrkar-a Information & Communication Technology (ICT) chuan an server host-na thin ‘Ctrl-S Data Center’ atangin a aia tha zawk leh secure zawka ngaih ‘Google Virtual Private Server’ (VPS) lamah insuan tura hmalak mek a nih thu an sawi.

Nimin-a a Pisa-a thuthar thehdarhtute a kawmna ah ICT Minister Dr. Vanlalthlana chuan ICT Department in mizoram.gov.in domain website 318 leh web application 14 a enkawl mek thu leh Institution domain ac.in leh edu.in hnuaiah website 12 a enkawl bawk tih sawiin, “Heng zinga website tam berte hi ICT Department siam (in-house), Senhri Content Management System a ni a. Heng website-te hi kum 10 chuang Ctrl-S Data Centre-ah host a lo ni tawh a ni,” a ti a. Tunhnaiah India leh Pakistan inkar boruak a that loh bakah India ram hi khawvela ram hmasawn pawl a lo nih tak avangin ram hrang hrang atangin Cyber attack thahnem tak a awm reng thu sawiin, “Kan State bik chauh ni lovin, State hrang hrangte pawhin hei hi an tawng ve reng bawk a. Khawvel boruak inlumlet zel thlirin ICT infrastructure thuamchak hi tih makmawh niin kan ngai a. Chuvangin, kan server host-na thin ‘Ctrl-S Data Center’ atangin a aia tha zawk leh Secure zawka ngaih ‘Google Virtual Private Server’ (VPS) lamah insuan tha zawka hriat a ni a, hmalak chhunzawm a ni ta a ni,” a ti.

ICT Minister chuan June ni 12, 2025 khan sawrkar website hrang hrangte server upgrade a nih dawn avangin a hmang thintu mipuite tan hun engemaw ti chhung chu tlawhpawh theih a nih loh tur thu Office Circular tihchhuah a ni tih sawiin, “Google Virtual Private Server (VPS) thara website hrang hrangte suanluh a nih dawn takah chuan website zawng zawng hi Internal Security Audit tih leh vek a ni a. Website 318 chuang audit hian hun pawh a duh rei deuh dawn a ni,” a ti a. Tun thleng hian Department website 23 tihnun a nih tawh thu sawiin, chungte chu – ATI, School Education, Samagra, Higher & Technical Education, I&PR, Health & Family Welfare, GAD, RD&A, LR&S, DP&AR, Finance, Home, LAD, PHE, Planning, Power & Electricity, Transport Department, ICT, Institutional Finance & State Lottery, LADC, MPSC, Tender website leh CMO te a nih thu a sawi a. Heng bakah hian web application kan neih ho, ILP, Handholding, Dakpu, DC Online, e-Leave, mPass, Fire & Emergency Online, Land Tax, MAeNGA, Mizothlaithar, MPSCO nline, RTI Online, SPARTAN leh Service Window-te pawh mipuite tan hman theih turin Google Virtual Private Server-ah dah fel a nih tawh thu a sawi bawk. Minister chuan hun engemaw chen website service tih khaihlak a nih avangin mipui leh sawrkar Office hrang hrangte hriatthiamna leh thawhpuina an ngen thu a sawi bawk.