Chanchinbumite tana Media Workshop buatsaih IPR&PS Minister in a hawng

Mizo Language Development Board (MLDB) bultumin Information & Public Relations, Printing & Stationary Department chuan nimin khan Aizawl-ah thuthar lakkhawmdan leh Mizo tawng ziah dan chungchanga zirhona, Media workshop for Journalists an buatsaih a, he hun hi IPR&PS Minister Dr. Vanlalthlana chuan a hmanpui a ni.

Chanchinbu mite tana buatsaih thuthar lakkhawmdan leh Mizo tawng ziah dan chungchanga zirhona I&PR Auditorium, Aizawl-a neih ah hian Minister Dr. Vanlalthlana chuan Chanchinbumite leh sawrkar chu inzawm tlat an nih avangin Chanchinbumite tana Workshop buatsaih a ni chu lawmawm a tih thu a sawi a. Chanchinbumite chu mipuite hnena thuthar an lakkhawmna ah a chinchhuaka chhui thin turte, awn lam nei lova chik taka thu te chhuah thin turte in a chah a. Inchhiarzau zel tur leh inzirthar zel tura fuihin, tum reng vang ni hauh lo pawha mipuite thinlunga thil tam tak tuh thei an ni tih inhre reng turin a chah a. Thudik tak mipuite hnena thlen kawngah te, tawnghmang dik leh ziah dan dik mipuite hnena zirtir kawngah te mawhphurhna pawimawh tak an nei tih inhre reng tura fuihin, hlawkthlak taka zirhona chu hmang turin kalkhawmte chu duhsakna a hlan nghal bawk a ni.

Nimin-a Workshop hawnna hi IPR&PS Department Director C. Lalnunkima chuan kaihruaiin kalkhawmte lawmna thu a sawi a, Khualzahawm IPR&PS Department changtu Secretary Bethsey Zothanpari Sailo pawhin thu sawiin, Chanchinbumite chu thu dik leh rintlak chauh chhuah thin tur te, mipui leh sawrkar tana hriatna hnar leh inzirna tlak nih tum zel turte in a fuih a. He hunah hian MJA General Hqrs. President C. Lalrambuatsaiha pawhin sawrkar leh Chanchinbumite thawhona tha tak chu lawmawm a tih thu a sawi a. Workshop chu hlawkthlak taka hmang turin kalkahwmte chu duhsakna a hlan nghal bawk a. IPR&PS Department-a Deputy Director Malsawmsanga chuan lawmthu sawiin hun hi a khar a ni.

He Workshop-ah hian mithiamte hnen atangin thupui hrang hrang- Media chungchang leh Mizo tawng ziah dante presentation hmanga zirtirna ngaihthlak a ni a. Chawhnu lamah IPR&PS Joint Director, Meena Zoliani kaihhruaiin heng thupuite hmang hian sawihona neih a ni bawk a. Hetiang Workshop hi District dangah pawh neih chhunzawm zel tum niin Serchhip District-ah chuan thla thar tir lamah neih tura ruahman a ni.