Chief Minister leh MHA-a Protector General of Emigrants a Joint Secretary te an inkawm

Chief Minister Lalduhoma chuan nimin khan a Pisa-ah Mizoram-a rawn zin mek Ministry of External Affairs, Protector General of Emigrants-a Joint Secretary Surinder Bhagat IFS chu kawmin Mizoram tana thil pawimawh hrang hrang an sawidun.

He inkawmna ah hian Chief Minister hian Placement Agency lem, rampawn-a dan lova hnathawk tura thawnchhuak thin te chungchang leh chung Agency te license tihtawp a nih tak dan te, an Prosecution Sanction pawh Protector General of Emigrants lama dil mek a nih thu te a sawipui a. China rama Mizo nula pakhat leh tlangval pakhat, MBBS zir tura kal, harsatna han tawk ta te chungchang leh Myanmar atanga raltlan lolutte biometric-a chhinchhiahna tur kalpui tan a nih dan te bakah Taiwan rama India sawrkarin thalai hnathawk tur thawn a tum chungchang te pawh an sawidun a ni.

Myanmar raltlante chungchangah hian Chief Minister chuan, tha taka rawn tlan, thuawih taka awm an awm thu leh an ram buai chhuanlama ramri kana tei kual thin, kan ram dan rawn bawhchhiat ching an awm bawk tih a sawi a. “Heng dan bawhchhiat chingte lakah hian khauh takin hma kan la dawn a, ramri rawn kan te Myanmar sawrkar ID hi an cham chhung chu laksak/kawlsak (deposit) zel mai zel thain kan hria,” a ti bawk.

Joint Secretary Surinder Bhagat hian, Placement Agency lem ten India mi ram pawnah an thawnchhuak a, chung mite hmang chuan India mite rawn bum (scam) an tum leh a, a buaithlak thin hle tih a sawi a. Ram pawna hnathawh tum kan thalaite an fimkhur a ngai hle tih pawh sawiin, Taiwan rama hnathawk tur lakna hi sawrkar laipuiin a kalpui thuai a rin thu a sawi bawk.

Chief Minister nena an inkawm zawh hian Ministry of External Affairs leh Mizoram sawrkar indawrna thil pawimawh dangte sawiin Vanlaldina Fanai, Commissioner & Secretary to Chief Minister leh Mizo Diaspora Cell hotute nen an inkawm zui leh bawk a. Chief Minister hi Adviser to Chief Minister TBC. Lalvenchhunga, Vanlaldina Fanai, Commissioner & Secretary, Mizo Diaspora Cell Chairman ni bawk leh CM Office-a official pawimawh ten an tawiawm a ni.