Zirtirtu sawnchhuah chungchangah buaina a tam thin avangin Transfer & Posting Rules thar duan a ni

School Education Minister Dr. Vanlalthlana chuan Zirtirtu sawnchhuah chungchangah buaina a tam thin avangin Transfer & Posting Rules thar duan a nih tur thu a sawi a. Sawrkar School zawng zawngte chuan Term Exam-ah zawhna inang (common question) an chhang tawh dawn tih a sawi bawk.

School Education Minister Dr. Vanlalthlana hian Inrinni khan NE Khawdungsei-ah Govt. Primary School-II hawngin Saitual-a DPO Samagra Shiksha Office leh zirna In thenkhat te a tlawh bawk. NE Khawdungsei-a Govt. Primary School-II hawnna ah hian Education Minister Dr. Vanlalthlana chuan School hrang hranga Zirtirtu indaihlohna tikiam turin Zirtirtu semrual kawngah theihtawp an chhuah zel tih sawiin, Zirtirtu sawnchhuah chungchangah buaina a tam thin avangin Transfer & Posting Rules thar duan a nih tur thu a sawi a. National-Level Entrance Exam hrang hrang NEET leh JEE-ah te Mizoram chuan State dang kan tluk lo thin hle tih pawh sawiin, zirlai naupang ten hriatthiamna nen lehkha an zir theih nan sawrkar School zawng zawngte chuan Term Exam-ah te zawhna inang (common question) an chhang tawh dawn tih a sawi a. Danglamna siam tur chuan syllabus leh zawhna kalphung siam that a, Zirtirtute chu training a tam thei ang ber pek a tul thu a sawi bawk.

Education Minister chuan sawrkarin mipuite rawn chung zelin hma lak a tum thu pawh sawiin, zirna In tan hun chungchangah pawh nu leh paten School Education website-ah te an duh dan an thehlut thei dawn tih a sawi a. NE Khawdungsei mipuite chu zirna In thar tha tak an neih ah a lawmpui thu sawiin, an kal lehzelna turah duhsakna a hlan nghal bawk a ni.

Khawdungsei-a Govt. Primary School-II hawnna inkhawm hi NE Khawdungsei VC President Lalhmingmawia chuan kaihruaiin Minister hian Govt Primary School-II hman tur Computer a hlan nghal bawk

Education Minister hian NE Khawdungsei a panna ah Saitual-a Samagra Shiksha DPO Office chu tlawhin District Education Officer leh Samagra Shiksha-a DPO Micky R. Lalenkawla leh Saitual District-a VC hruaitute nen an inkawm a. Hemi hnu hian Hliappui-ah khawtlang hruaitute nen inkawm lehin NE Khawdungsei-a Higher Secondary School (Lumpsum) leh LTM High School, Ngopa chu a tlawh leh bawk a ni.