June ni 21, 2025 thlenga Sawhthing lak tawh quintal 2,15,900 a tling tawh tih Minister in a sawi

Agriculture & Farmers Welfare Minister PC. Vanlalruata chuan June ni 21, 2025 thlenga Sawhthing lak tawh zat belhkhawm chu Qtl. 2,15,900 zet a tling tawh tih sawiin, “Sawhthing rate chhiat ber kumah pawh sawrkarin cheng vbc. 85 chuang a seng tawh a ni,” a ti.

ZPM Party in nimin-a Aizawl-a an party Office-a Chhung Inkhawm an neih ah Agriculture & Farmers Welfare Minister PC. Vanlalruata chuan sum leh pai tam tak sen a ngai dawn tih hre reng chungin thlai thar lei an buaipui mek tih sawiin, “Sawrkarin direct-a Sawhthing a lak zat hi quintal 94,160 a ni a, Support Price a pek zat hi quintal 1,21,740 a ni tawh. June ni 21, 2025 thlenga Sawhthing lak tawh zat belh khawm chu Qtl. 2,15,900 zet a tling tawh a. Sawhthing rate chhiat ber kumah pawh sawrkarin cheng vbc. 85 chuang a seng tawh a ni. Hmunphiah chungchangah Empanelled Firm ten sawrkar rate anga lei turin an intiam a, an intiam anga an kal leh tak loh avangin kan bultanna a fuh hlel deuh hlek a, chuti chung chuan ZOHANDCO kaltlangin kumin March thla chhung khan Sawrkarin kg. 2,49,828 a lei a. Kum a lo thar anga, Hmunphiah ro chu Grade sawi lovin sawrkarin a lei dawn a ni,” a ti a. “Thlai thar lei chungchangah hian kan Chief Minister a fakawm takzet a ni. Sum leh pai harsatzia leh Sawhthing rate chhiat ber kum a ni tih hre reng chungin Kuthnathawktute tihbeidawn a duh lo a, a Department changtu Minister ka nihna ang pawhin ka lawm takzet a. Zoram kuthnathawktute lawmthu sawina pawh ngaihthlak a nuam hle a ni,” a ti bawk.

Agriculture Minister chuan sawrkar kal tawhte khan kuthnathawktute hi Market chungchangah an lo vil zui na tawk lo deuh nia sawiin, “ZPM chuan thlai thar thlan bik pali neiin chungho chu a buaipui hna sawrkarin a thawk tawh a, a la thawk zel dawn bawk a ni. Heng thlai thlan bik mai ni lo hian Buhhum pawh sawrkarin tam tak a lei tawh a. Sawhthing bikah hian Siliguri pel lovin Mizoten kan lo hralh nasa hle mai a, Bagha vai kan pek te pawh hian Siliguri thleng an phur a, chuta tang chuan Buyer lian ten an lo la chhawng ve leh thin. Kumin atang chuan phai Buyer lian ten Mizoram Sawhthing an hre chho tan ve ta hi a lawmawm hle,” a ti bawk

Kan ramah eng thlai hi nge kutha-thawktute tan hmasawnna ngelnghet awm thei ang tih a ngaihtuah thin thu pawh Minister chuan sawiin, “Tung hi phai lamah a rah tha thei lo a, Mizoram leilung hi a ngeih em em a, Tung han sawimawi leh pawh a zahthlak deuh lek lek tawh chungin; India hian Tung hriak a mamawhna hi a lo sang em em mai a, ka Bial chhungah hma kan la chho leh mek a ni,” a ti a. “Lo an neihna chul hmang tangkaiin Hmuntha khuaah Tung an phun khat vek tawh a, Tualpui khuaah pawh Tin 300 hmun bawr velah Tung an ching tan mek bawk. Kan thlai thar te hi a tam tham loh chuan a market-ah harsatna kan tawk thin a, thlai emaw, thei lam emaw pawh ni se bawh bik kan neih a ngai. Tunah Sapthei-ah pawh hma kan la chho mek a, kan Sapthei variety hi phai lam aiin hmun Zo lamah a tha duh a, Grade A leh B te thawnchhuah atan kan hralh anga, Grade C te chu theitui siamnan kan process dawn a ni,” a ti bawk.

Agriculture Minister PC. Vanlalruata chuan an sawrkar chu mipuite tana tha ber tur a nih chuan huai takin a kal zel dawn tih pawh sawiin, “Health Care Scheme pawh eptuten sawiselna tur zawng nasa hle mah se a chhawr mektu leh la chhawr tangkai zel tur mipuite kan thlir a, mipuite lamah sawrkar a tan avangin hnung tawlh lovin kan kal zel dawn a ni,” a ti a. “He sawrkarah hian mimal hamthatna tur leh hlawkna um ringawt te tan hmun a awm lo a, kan Minister te leh MLA te zingah mahni tanghma hai ka hmu lo a, party mite pawhin Zoram damna tur hi thlir turin ka duh che u a ni,” a ti bawk.