Mizoram-a Myanmar raltlan te Biometric Enrollment ti turin ruahmanna peihfel thawkhat a ni tawh

Mizoram-a Myanmar raltlan mi 32,000 chuangte mit naute leh kutze thlalak hna tan thei turin ruahmanna peihfel thawkhat a ni tawh a. Hetihlai hian Myanmar atanga Mizoram-a raltlan awm chu tunhnaiah tlem hretin raltlan thenkhat te chu an ramah an kir leh tawh a ni.

Home Department hotute sawi danin kar kalta Zirtawpni khan National Informatics Centre (NIC)-a mithiamte chuan Myanmar atanga Mizoram-a raltlan rawn lut te chhinchhiahna tur atan hian Biometric Enrollment chungchangah Mizoram District hrang hranga he hna thawktu tur Official-te training an pe a. Hei hi a taka Biometric Data khawnkhawmna Online Biometric Enrollment Portal hman zirna a nih rualin he hna atana inpuahchahna pawimawh a ni a. Hetihlai hian chung hmanraw lei belh leh ruahmanna kimchang siam te chu la hmabak a nih avangin tun mai-ah rum rum chuan he hna hi tan theih a la ni dawn lo nia hriat a ni a. Ministry of Home Affairs (MHA) thuneitute leh Mizoram sawrkar-a Home Department hotute hian hemi chungchang hi biakhmuhtheih kaltlangin May ni 16, 2025 khan an lo sawifel tawh a. Hemi atanga thlakhat ral hnu vela NIC mithiamte'n Biometric Enrollment Portal an siamfel takah chuan Myanmar raltlante mit naute leh kutze thla la a chhinchhiahna tur hi a taka kalpui theih a ni ta a ni.

Sawrkar hmasa hun lai atang khan Biometric Data lakkhawm hi kalpui turin sawrkar laipui-a Ministry of Home Affairs chuan a rawn hriattir tawh a. MNF sawrkar khan kum 2023 chawhnu lama Assembly inthlan lo awm tur atan inbuatsaih a tul thu chhuanlam a hmangin an lo thulh tawh a. Hemi hnu pawh hian MHA-in Enrollment Portal atana Form a rawn siam chu ramdangmi India rama dan kalha awm thawnkir turte tana siam a nih avangin Myanmar raltlante chhinchhiahna atan a hman theih loh avangin thawnkir leh a ni a. MHA hian Form a rawn siamthat leh hnuah Enrollment Portal hi NIC-in a duang tan a, tunhnai khan an siam zo thei ta a ni.

Sawrkarin a chhinchhiah dan chuan tunhnai ah Myanmar atanga Mizoram-a raltlan rawn lut zingah an ram-a kir leh hmundanga kal an awm avangin Mizoram-a awm an tlem hret a. Tun dinhmuna Myanmar raltlan awm zat chu an vaiin mi 32,419 an ni a. Champhai District-ah raltlan hi la tam berin mi 13,586 an mikhual mek a. Lawngtlai District-in dawtin mi 6,017 an awm a, Siaha District-ah mi 5,036 an awm bawk a. Tunhnaia chhuak an awm nualna Aizawl District-ah mi 3,669 awmin an awm tlemna ber Kolasib District-ah mi 129 an awm mek a ni.

Myanmar a Chin State atanga raltlante hi sawrkar sipai-in kum 2021 February ni 1-a Myanmar mipui sawrkar paihthla a thuneihna an hnehchhuh hnu thla khat vel atangin Mizoram-ah an lo lut tan a. An tam lai ber chuan mi sing nga vel an tling hman a, an khua a ralmuan tak deuh hnu a kir leh bakah hmun danga kal darh an awm avangin Mizoram-a raltlan awm hi an tlem hret hret a, a changin lo luh belh an awm ve reng bawk a, chuvangin Mizoram in raltlan a mikhual zat hi a danglam reng a ni.

Hetihlai hian Mizoram leh Myanmar inkar ramri hung chu dodalna karah Central sawrkarin a thulh tak thu hriat a la awm lova. Ramri hi hung a nih dawn pawhin a hma-in ramri-ah kawng sial chhuah tura ruahman a ni a, kawng siam hna thawktu tur Border Roads Organisation (BRO) thuneitute chuan kawng siam hna hian kum 5 tal chu a duh an rin thu an sawi a. Tunhnaia MHA Official lo zinte hnenah Mizoram sawrkar Official-te chuan ramri hung chu a senso a hauhtak tur ngaihtuahin a tangkai vaka an rin loh thu an lo hrilh nia thudawn a ni.