Motor kawng dan tuartute hnenah ngaihdam dil

Aizawl Tennis Court leh a chhehvela Inrinni-a chawhmeh zuara inpho thin te chuan June ni 21, 2025 (Inrinni) a lungawi lohna lantir nana motor kawng an dân tuartu zawng zawng chungah ngaihdam an dil.

    Nimin a Aizawl Press Club-a thuthar thehdarhtute an kawmna ah chawhmeh zuartute chuan Aizawl Tennis Court leh a chhehvelah hian kum 2000 hmalam atanga thu tan tawh an nih thu leh Aizawl Municipal Corporation a lo pian hnuah pawh The Street Vendors (Protection of Livelihood and Regulation of Street Vending) Act, 2014 hmanga an dikna leh chanvo te humhim theih a nih dânte hrilhhriat an nih thu an sawi a. Tunhnaiah AMC Multi-Complex Building, Tuikual South-a sak chu Inrinni chauh a kawng kama thu thinte tana ruahman ni lovin, Treasury Bazar-a kar tluana thute tan liau liaua sak a ni tih an sawi a, kumin March thla Inrinni hnuhnung berah khan thuneitute'n building sak tharah chuan lut turin an nawr thut tih an sawi a. A tirah chuan building chhawng hnuai lam Parking-a lirtheite dahchhuah tirin an thut tir a, kawng bul mai a nih avangin an inhralhna pawh a la zia deuh tih sawi bawkin, tunah chuan building chhawng 4-na, mi 80 vel thut theihna tura siamah mi 200 dawn hnawhluh an nih thu te an sawi bawk a ni.