FCS&CA Department in thla thum (3) chhung Ration Buhfai semchhuah tur chungchang an sawifiah

Food, Civil Supplies & Consumer Affairs Department chuan thla thum (3) daih Ration buhfai sem tur chu FCI atangin phurhchhuah kim vek a nih tawh thu sawiin, hemi atana hma an lakna leh harsatna awm hrang hrangte sawiin, semchhuah tan theih a nih tawh thu an sawi bawk.

Nimin a thuchhuah an siamah FCS&CA Department chuan Furpui lo thleng tur thlirlawka Central Sawrkarin State sawrkar te NFSA buhfai (a thlawn chin) thla thum (3) chhung (i.e. June, 2025 atanga August, 2025) pe thei tura a ngen angin Mizoram sawrkar Supplies Department pawhin theihtawp chhuaha hma lain, thla thum (3) daih Ration quota hi FCI atangin a phur chhuak kim vek tawh tih an tarlang a, June thla bul lam khan sem nghal mai tum a ni nachungin khawl thilah rokhawlhna a awm avangin sem theih hun hi a tlai ta deuh tih sawiin, mipui hriatthiamna an ngen a ni.

FCS&CA Department chuan a ruala thla thum (3) quota sem hi la tih ngai loh anih avangin Supplies Department leh NIC te chuan AePDS Software (Ration semna software) her danglam dan ngaihtuaha hmalak a ni tih sawiin, an hmalak dan tlangpui an tarlang a. A tirah buhfai a thlawn chin bik chu Despatch Order (DO - Godown atanga Retailer-te hnena buhfai pekchhuahna order) hi vawi khat ah thla thum (3) daih tur generate tur a nih thu tarlangin, hemi hnu hian ePoS device-ah vawikhat hmehin, thla thum atan a in issue (pechhuak) tura ngaih a nih laiin, thla thum DO a hlawma siam chhin khan ePoS device-ah vawi khat hmeh chuan a lo in issue thei lo tih an sawi a. Hemi hnu hian DO chu thlakhat te te a siam lehin, Retailer ten an ePoS device-ah an receive a, mipuia semchhuahna tur ber Module, Cash PDS chu ePoS device-ah a lang leh thei ta lo tih pawh sawiin, June 20, 2025-ah Cash PDS hi a rawn lang leh tawh a, retailer thenkhat ePoS atanga ration pekchhuah chhin tum a ni a, amaherawhchu, a pekchhuah tur zat (kg zat) a lang leh thei lo a, hei hi June 21, 025 thleng khan a that loh thu an sawi a.

Hemi hnu June 23, 2025 atangin epos machine chu hman theiha a siam theih tak thu leh Ration la tur ten tum thum zel hmeh tur a ni tih pawh FCS&CA Department thuchhuah chuan tarlangin, “Thla thum ration NFSA quota hi dan pangngai angin a thlawn veka khul tur a ni a, mipuite chu harsatna awmlo a NFSA thla thum ration quota la vek tur leh retailer te pawn an mawhphurhna tha taka hlenchhuak theuh turin Supplies Department chuan duhsakna a hlan a ni,” an ti a. “Card Pawl, a man nei chin (Additional 3 kg @Rs.15/- per kg), Card Var leh Card Sen hi a pangngai a, thla khat te te a lak tur a ni thung ang,” an ti bawk.