Lenkawl

February 28, 2025 (Zirtawpni) hian Children Science Festival chu Serchhip District tan District Park, Dawngzawl-ah buatsaih a ni dawn a. A  duh apiang tan kal theih a ni. He hunah hian luh man a awm dawn lo a. Science games chi hrang hrang lawmman dawn theihna te a awm dawn bakah, fair leh model exhibition te, Rul show te pawh a awm dawn bawk a ni. A buatsaihtu DIET Serchhip te chuan lo kal vek turin kan sawm a che u.

 

Thla thar March 7-a Chapchar Kut hmang turin Serchhip-ah inbuatsaihna kalpui mek a ni a, YMA Branch hrang hrangte chuan Hnam Lam an entir tur ngawrh taka chhun leh zam lamah an zir mek a, Chapchar Kut-a zir tura ruat te pawhin ngawrh takin inbuatsaihna an nei mek bawk a ni. Serchhip-ah hian Chapchar Kut hi Serchhip Sports Complex-ah hman tura ruahman a ni a, District Bawrhsap Paul L. Khuma chu Kut Pa ni tura beisei niin Serchhip Sub-Hqrs. YMA President Kawlthuama chu Kut Thlengtu a ni ang.

Serchhip District-a Secondary Collection Centre hrang hrangah Sawhthing lei mek niin Ser-chhip Cluster-ah Sawhthing kg. 1,08,215 zet buk ni tawhin Sawhthing hralhtute hnenah Sawhthing man hi pekchhuah mek a ni bawk.

MNF President Zoramthanga chuan tunkar chhung khan Champhai, Samthang leh Khaw-zawl te tlawhin an party mipuite hmaah thu a sawi a, tunhmaa MNF in an ngam loh lian ber chu Mizo Union a nih thu leh a hnuah PC party niin an ral tawh tih a sawi a. “Congress pawh er tham an awm tawh lo, anni hi Central (Delhi)-a innghat an ni a, khulam an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni leh tawh,” tiin “ZPM chu Tiau vut chunga In sa, Chirhdiak chunga In sa ang lek an nihna zawng zawng kan hrechiang tur a ni,” a ti bawk.

BJP Mizoram Pradesh chuan Oil Palm Growers Association Kolasib District leh Mamit District ten Central Scheme NMEOOP atanga kum 2022-2023 a Viability Gap Payment (VGP) Support Price cheng vbc. 2.2 an hmu leh kum 2023-2024 atana nuai 76 lai Central Sawrkar atanga an hmuh bakah thlatin Central Sawrkar in Oil Palm Growers Association te puihna tur a ruahman sak chu an lawmpui thu thuchhuah siamin an tarlang a. “Central Sawrkar Pu Modi-a kaihhruai chuan Kuthnathawktute tan theihtawp chhuahin hma a la,” an ti bawk.

Hnahthial District Fishery Development Officer George Lalnuntluanga leh Leite Branch YMA-te chuan nizan hmasa khan Mat lui-ah dan phal loh Bleaching Powder leh Dynamo hmanga Sangha hraitu nia hriat Zobawk South khaw mi leh sa nia insawi mi pathum te chu an man.

Information & Public Relations Department chuan nimin atang khan ni hnih awh tur 'Film Workshop for local Film makers' chu Lianchhiari Run Mini Theatre, Aizawl-ah neiin I&PR Minister Dr. Vanlalthlana chuan a hawng a, Film chu khawvel leh India ram ah ngei pawh Industry changtlung sa tak a nih thu sawiin, film lam a tui Mizo thalaite chuan khawvel hmuh ah an thiamna leh theihna phochhuahna atan leh eizawnna kawng a dinchhuah nan hmang tangkai thiam turin a chah a. Film siam in a kentel lemchan thiam bakah script ziah te, rimawi te, thuam inbel tur ngaihtuah te, make up chi hrang hrang hman thiam te chu Film Industry peng pawimawh tak tak vek a nih thu a sawi bawk. He hun hi I&PR Director C. Lalnunkima chuan a kaihruai a ni.

Indo-Israel Agriculture Programme (IIAP) hnuaia Mizoram-a Horticulture Department te hmalakna enfiahin Israel Agriculture mithiam, Uri Rubinstein chuan Mizoram a rawn tlawh a, tunkar Thawhlehni khan Centre of Excellence for Fruit, Lunglei tlawhin Nilaini khan Serchhip District chhung Zawlpui Zau-a Centre of Excellence (CoE) for Vegetable hmun tura ruahman chu tlawhin Zawlpui Vegetable Growers te nen an inkawm nghal bawk a ni. Uri Rubinstein hi nimin khan All Horticulture Officers Meeting-ah tel nghalin Horticulture Department hmalakna a hmuh dan te a sawi bakah a thawktute inpekna te pawh fakawmi a tih thu a sawi a. Nimin vek khan Horticulture Minister Prof. Lalnilawma chu kawmin hmalak dan tur hrang hrang an sawidun bawk a ni.

National AYUSH Mission Health Programme Sports Medicine hnuaiah Mizoram State AYUSH Society leh Lunglei District Football Association (LDFA)-te chuan nimin khan Health Minister Lalrinpuii Pisa-ah thawhhona thuthlung an ziak a, Mizoram State Ayush Society aiawhin Mizoram State, AYUSH Society Executive Body Chairman Sangchhin Chinzah leh LDFA aiawhin President PC. Lalramnghaka ten an hming an ziak a ni. He thawhhona hnuaiah hian Mizoram State Ayush Society chuan Lunglei District Football Association hnuaia players te hnenah Stress Reduction atan exercise chi hrang hrangte mithiamte nen zirtirna an pe thin anga, Tournament a awmin Medical Support pein, AYUSH damdawi hmangin a theih chin chinah a thlawnin an enkawl thin dawn a ni.

Mizoram Anthurium te chu a vawi khatna atan Singapore a thawn turin niminpiah khan Agriculture Secretary Ramdinliani chuan a vailiam. Agriculture Product Export Development Authority of India (APEDA) leh Horticulture Department Mizoram leh Zo Anthurium Growers Co-operative Society te tangkawp in a vawikhatna atana Singapore-a Mizoram Anthurium an thawn hi Anthurium chingtute tan a hlawk zawk theih beiseina a san avanga thawn niin First Trial shipment atan par 1008 thawn niin kg. 70 a rit a ni a, Directorate of Horticulture, Aizawl atangin an thawn a ni. Mizoram Anthurium te hi kum 2004 vel atanga chin tan niin Zo Anthurium Growers Cooperative Society hian Aizawl leh District hrang hrangah Member 150 vel an nei a, kum 20 vel State pawn-Delhi Phool Mandi- Ghazipur-ah Anthurium te hi an hralhchhuak tawh a ni.

Union Minister of State for Road Transport & Highways leh Corporate Affairs Harsh Malhotra chuan nimin khan Saitual tlawhin sawrkar hotu lu te leh khawtlang hruaitute a kawm.

Chief Minister Lalduhoma chuan NITI Aayog Member Dr. Vinod Kumar Paul leh NITI Aayog Official-te hnenah Mizoram sawrkarin Handholding Scheme a kalpui dan leh Healthcare lama a hmachhawp-te a tarlang.

Lai Autonomous District Council (LADC)-a Chief Executive Member (CEM) atan Paithar bialtu MDC leh ZPM hruaitu V. Zirsanga chu nimin khan Lawngtlai DC, Cheemala Siva Gopal Reddy chuan rinawmna thu tiamtirin a lalut a, CEM atana V. Zirsanga lakluh tur hi MNF Thalai leh Congress Thalai chuan an duhlohzia an lantir thung a ni.

Mizoram Pradesh Congress Committee (MPCC) chuan nimin khan Aizawl Press Club-ah thuthar thehdarhtute kawmin ‘The Mizoram Agricultural Produces (Restriction on Movement) order 1994’ chungchang an sawifiah.

Ministry of Road Transport and Highways (MoRTH) in lirthei hlui tawh te hluihlawna, a thar a thlak tura lirthei neitute tana ruahmanna a siam, Voluntary Vehicle Modernization Policy (V-VMP) hnuaiah Transport Minister Vanlalhlana chuan nimin khan Department 17 te hnenah lirthei thar 27 a hlan.

Kum kalta 2024 chhung khan Serchhip District chhungah Police ten thubuai 191 ziaklutin heng zinga 172-ah chuan nikum chhung khan Chargesheet thehluh hman a ni a, thubuai ziahluh zawng zawng atanga za zela 64 vel zet chu rukruk leh a kaihhnawih thubuai a ni.

Mizo Hmeichhe Insuihkhawm Pawl (MHIP) bultumin nimin khan Serchhip-ah ‘Faina hnatlang pui’ neiin khawpui chhung thenfai hna an thawk a, he hnatlang-a thawkchhuak te hi hlawm thum ah inthenin, Serchhip chhimlam leh hmarlam te bakah Chhiahtlang-ah te khawpui chhung thenfai hna hi an thawk a, he hunah hian MHIP Branch hrang hrang atangin mi 200 vel an thawk-chhuak a ni. He Faina Hnatlangpui-a thawk te hian Serchhip Bazar leh a chhehvel leh khawpui chhung kawngpui dung te thianfaiin Serchhip District Hospital leh a chhehvel te pawh an thian nghal bawk a ni. MHIP Sub-Hqrs. Serchhip ah hian Branch 85 awm mekin heng zinga Branch 20 te chu Serchhip Town chhunga awm an ni.

New Serchhip North Village Council Member thar te hlanna leh VC House thar hlanna hun chu nimin khan hman a ni.

Mizoram tlawha rawn zin 16th Finance Commission hnenah Mizoram sawrkar chuan Department 29-te mamawh bik enkawlna leh hnathawhna atan cheng vbc. 7,541 leh nuai 93 a lo dil a. Finance Commission te hian nimin khan Serchhip atanga Lengpui panin Mizoram an chhuahsan a ni.

NITI Aayog Member Dr. Vinod Kumar Paul chuan natna hmuhchhuah hma chu hriselna lam leh damlo enkawlna atana thil pawimawh tawpkhawk a nih thu a sawi.

Ramri buai chungchangah Mizoram leh Assam sawrkar Official-te chuan March thla tawp lama inbe turin ruahmanna an siam.

Thla thar March ni 12-a Chakma Autonomous District Council (CADC)-a Village Council inthlanpui neih turah Candidate 1026 an awm a, Political Party 4 - ZPM, MNF, INC leh BJP bakah Independent Candidate 66 an awm a ni.

PHE Minister Prof. Lalnilawma chuan nimin zing khan Tlawng Lui (Reiek Kai)-a tui kam khuahna, Temporary Barrage siam hna a hmunah a enfiah a, Aizawl khawpui chawmtu Tlawng Lui hi a kum tela a kam zel avangin kum 2022 atang khan Thal intan tak tak hmain tui khuah nan Temporary Barrage chu kumtin siam thin a ni a. Barrage hi meter 2.5-a sanga siam thin a ni a, hei hian metre 350 vel tui tling tura beisei a ni a. hemi atana an hnathawh hrang hrangte chu en ho a ni.

Lunglei Sub-Hqrs. YMA buatsaih HPC Inter-Branch YMA Futsal Tournament 2025 kharna nimin-a C. Thuamluaia Mual, Lunglei-a neih chu Lunglei High Powered Committee (HPC) Vice Chairman V. Malsawmtluanga chuan a hmanpui a. He Tournament-ah hian Branch YMA 20 atangin Mipa Team 28 leh Veteran Team 12 telin Mipa-ah Chanmari Branch leh Veteran-ah Electric Veng Branch te chuan Final-ah an khingpui hnehin an Champion a ni.

Vairengte Police leh CID (Special Branch) te chuan nizan hmasa khan lirthei pakhat atangin cheng nuai 299 hu Methamphetamine nia hriat an man a, thudawn danin Vairengte Police leh CID (SB) Staff te hian Vairengte Police Check Gate-a lirthei an enfiahna ah Car var pakhat, Champhai District Zokhawthar atanga Assam lam pan chu ringhlelin an endik a, He Car kawngkhar pali chhung lama thuhruk Methamphetamine nia hriat fun 20 chu an man a, a vaiin kg 23.43 a rit niin cheng nuai 299 man hu nia chhut a ni. Hemi kaihhnawih ah hian Motor khalhtu Vanlalfela (23), Zokhawthar nia insawi leh a thurualpui Zing-engmawia (27), Falkland, Aizawl, tuna Zokhawthar-a cheng nia insawite chu manin thubuai siamsak nghal an ni bawk.

Lunglei District chhunga Bank hrang hrang te hmalak dan thlirin niminpiah khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) thutkhawm neih a ni a, he hunah hian kum 2024 October atanga December (3rd Quarter, 2024-25) chhunga Lunglei District-a Bank hrang hrangte hnathawh thlirlet niin, hmachhawp an neih leh hmalak zui dan turte sawiho nghal a ni. He hunah hian Lunglei District-ah 3rd Quarter 2024-25 chhungin Bank ten Credit/Deposit Ratio 71.69% an nei tih tarlan a ni a. He hunah hian NABARD, Mizoram Regional Office, Aizawl-in a buatsaih Lunglei District chhunga kum 2025-2026 chhunga Agriculture kaihhnawih leh Bank behchhana hmalak theihna tur ruahmanna, 'Potential Linked Credit Plan 2025-2026' chu tlangzarh nghal a ni bawk.

Kum 2020-2021 atanga kum 2024-2025 chhunga Mizoram sawrkarin Labour Cess a hmuh chu Rs. 183,34,56,074.62 a ni. Labour, Employment, Skill Development & Entrepreneurship Department Minister Lalnghinglova Hmar-in MNF Member Ramthanmawia zawhna Assembly House-a a chhan danin sawrkar kum kallai mek 2024-2025 chhung hian sawrkarin Labour Cess Rs. 57,19,50,253 a hmu a. Kum 2020-2021 khan Cess hi Rs. 14,06,09,340 a lut a, a kumleh 2021-2022 khan Rs. 22,87,58,491 a lut leh a. Kum 2022-2023 khan Rs. 42,29,88,182 a lut a, kum 2023-2024 khan Rs. 46,91,49,808 a lut a ni. 

Lunglei West bialtu MLA T. Lalhlimpuia chuan niminpiah khan Lunglei District Jail tlawhin SASCI (Scheme for Special Assistance to States for Capital Investment) sum hmanga District Jail sak dan tur ruahmanna a hmunah a enfiah a, District Jail-a duty Mizoram Home Guard Civil Defence barrack chhe tawh tak sak that dan turte a enpui bawk a. SASCI sum a Lunglei District Jail sak that dan turah ruahmanna (estimate) ang thlap leh mamawh phuhru zo ngei tura tha taka hna thawh chu sawrkarin a duh ber a nih thu sawiin, hna tha chiah an beisei thu a sawi a ni.

Lengpui Airport Forum chuan Mizoram sawrkar in Lengpui Airport chu Indian Air Force kuta a hlan chuan, hnam rohlu, hruaitu hmasa ten harsa taka an lo sualchhuah chu Mizoram in a chan kumkhua tawh dawn nia sawiin, lak kir leh theih a ni tawh dawn lo niin an sawi.

Health & Family Welfare Department hnuaia Mizoram Health Systems Strengthening Project (MHSSP) hmalaknain ke-a kal thatzia inzirtirna, ke-a kal runpui 'Walk for health- Walkathon 2025' chu nimin khan Saitual District-ah neih tan a ni.

India (Mizoram) leh Myanmar inkalpawhna,Tiau lui-a Lei chu a hma anga zalen taka inkalpawh theih loh turin Assam Rifles te an la duty chhunzawm zel.

Lai Autonomous District Council (LADC) term kal meka Chief Executive Member (CEM) palina turin V. Zirsanga chu Vawiin hian lakluh tura ruahman a ni a, V. Zirsanga hi tun Term-a CEM a nih tum hnihna tur a ni bawk.

Mizoram Poor Federation chuan mirethei ten an chanvo dik tak chang turin Ration Card-ah an awm em tih enfiah tura zinchhuah an tum thu an sawi.

ZPM Party chuan sawrkar in thlai thar lai a kalpui mek laia kuthnathawktu thenkhat ten rinawm lohna an lantir nghal mai chu pawi an tih thu an sawi.

Mizoram-a rawn zin mek 16th Finance Commission Member te chuan nimin khan Zoram Medical College & Hospital (ZMCH), Falkawn chu tlawhin Falkawn VC te an kawm bawk a, nimin tlai khan Serchhip District an rawn thlengin zan an riak nghal a ni.

Krishi Vigyan Kendra (KVK) Serchhip District North Vanlaiphai chuan nimin khan Scientific Advisory Committee vawi 19-na an nei.

Tun thla tir atanga Serchhip-a ‘Road Safety Month’ hman mek denchhenin nimin khan Serchhip khawpui chhung hmun hrang hrangah Traffic Police te chuan lirthei document fel lo enfiah hna an thawk a, he hunah hian lirthei 649 enfiah niin dan zawm lo mi 11 an man a, heng mite pawisa chawi tlingkhawm chu Rs. 18,500/- a ni. Nimin-a Traffic Police te duty hi Govt. Serchhip College-a NCC te chuan puiin New Serchhip Ki-kawn, IOC Veng, Serchhip Bazar leh Sailiam-kawn-ah te lirthei hi enfiah a ni a, hetianga NCC ten nasa taka an pui chu lawmawm an tih thu Serchhip Traffic Police te chuan LENKAWL hrilhin, lirthei enfiah zingah document felfai an tam zel chu lawmawm an tih thu an sawi bawk a ni.

Sawrkar chuan Section 223 of BNS hmanga hremna hremna pek dan kalphung a sawifiah.

Consumer te I harh ang u XLIV : Eirawngbawlna Gas a harsatna nei te tana complaint dan - Laldinpuia Secretary, Serchhip District Consumer Association

Chief Minister Lalduhoma chuan, Kalphung thar mipui Sawrkarah PWD in hmel thar a hmuh mek thu sawiin, thawktute pawhin tan an lak chhoh zel angaih thu a sawi a. Hmasawnna hna kal lai mek leh a nih tur ang a nih hmaa eptu Party lamin Sawrkar beih nana an hmang thin chu pawi an tih thu a sawi bawk.

Ni thum chhung awh Aizawl Day lawmna chu nimin khan Aizawl Municipal Corporation (AMC) bultumin Aizawl Lammual-ah neih tan a ni a, Aizawl Mayor Lalrinenga Sailo chuan he hun hi a hmanpui a ni. Aizawl Day lawm chhung hian intihhlimna chi hrang hrang neiin Exhibition en tur leh lei tur bakah eitur chi hrang hrang zawrhchhuah a ni ang.

Mizoram Pradesh Congress Committee (MPCC) chuan Special Judge (Prevenvention of Corruption Act) chuan eiruk thubuaia thiamloh a chantir leh High Court-a a khinlet avanga Bail a chhuahtir mek Mizoram sawrkar in LADC Chief Executive Member atan ruat chu mipui zahlohna lian tak leh eiruk chingte vulh lennaah an ngai tih nimin khan thuchhuah siamin an tarlang.

Sawrkar Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kaltlanga Lunglei Ramthar Veng a Futsal Ground siam thar chu nimin khan  Lunglei South bialtu MLA Lalramliana (Papuia) chuan a hawng a, Cheng nuai 290.97 senga he Futsal Ground siam hi Semi-Indoor niin RCC Structure leh Steel Structure hmanga sak a ni a. Eng hun pawha hman theih turin a chung neia siam niin mi 100 velin an en theihna tur Gallery siam nghal a ni bawk.

Kumin a Zakapa Award semna March 11 a nei tura inbuatsaihna kal zelah Zakapa Award Organising Committee buatsaihin nimin khan Seminar cum Consultative Meeting on Zakapa Award chu Aizawl-a I&PR Conference Hall, Lian-chhiari Run-ah neih a ni a, he hunah hian Seminar puala sawm bikte atangin Zakapa Award kaihhnawiha thupui thlanchhuahte hmangin presentation ngaihnawm tak tak ngaihthlak ho a ni a, Social Welfare Women & Child Development Department changtu Commissioner & Secretary Lalzarmawii chuan he hun hi a kaihruai a ni.

Environment, Forests & Climate Change changtu Minister Lalthansanga chuan nimin khan Chief Wildlife Warden Office Conference Hall-ah ‘Lalramthanga Wildlife Library’ hawngin March thla tawp lam atanga neih tur Eco Fest Logo khuh hawnna a neih bakah Eco-Fest T-Shirt leh Promo Video a tlang zarh nghal bawk. Forest Minister chuan nimin-a hawn tak Wildlife Library chu tangkai lehzual a hmang turin kalkhawm te a chah a. Ramgaw leh nungcha humhalhna kawnga tanlak a tul zia leh mipuite hnenah awareness pek a tul thu leh chumi kawngah chuan nasa lehzuala tan la turin Department hotute a chah bawk a. Kan hma mai a Eco-Fest neih tur chuan Eco-Tourism lama Mizoramin hma a sawn nan rahbi pawimawh tak a thlen a beisei thu a sawi bawk.

India Meteorological Department (IMD), Ministry of Earth Science leh Directorate of Science & Technology, Govt. of Mizoram te chuan Directorate of Science & Technology hmunhma a IMD Centre dinna tur inremna (Memorundum of Understanding) chu niminpiah khan an ziak a, Directorate of Science & Technology aiawhin Chief Scientific Officer H. Lalsawmliana leh IMD aiawhin Sudheer Kumar Dwivedi, Director, IMD te chuan Chief Minister Lalduhoma hmaa MoU hi an ziak a ni. MoU angin Beraw Tlang-a Science & Technology Centre-ah IMD Centre din a ni anga, IMD hian Mizoram sawrkar hnenah Meteorological data a pe thin ang. Weather forecast leh report dik leh rintlak zawk a neih nan hman a ni dawn a ni.

Sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kaltlanga cheng nuai 127.38 senga sak, Lunglei Lunglawn-a Community Service Centre (CSC) chu nimin khan Lunglei South bialtu MLA Lalramliana (Papuia) chuan a hawng a, a bial chhung Lunglawn-a CSC tha tak sak zawh leh hawn theih a ni ta chu lawmawm a tih thu sawiin, bul tantu sawrkar hmasa chungah leh Sports Minister leh bialtu MLA hmasate chungah lawmthu a sawi bawk.

ZPM Thalaite chuan Mizoram Sawrkarin MPSC a thuam chak tawk lo nia sawi chu thu belhchian dawllo niin an sawi.

Mizoram-a thlai tharchhuah hrang hrang te sawngbawl dan leh hmasawnna hrang hrang sawiho hun, ‘National Seminar on Packaging, Export Promotion and Digital Marketing’ chu nimin khan Aijal Club-ah neih a ni.

Mizoram-a Police Station hrang hrangah kum thum kalta chhung khan Mobile Phone bo chhui chhuah 875 a awm.

Mizoram Sawrkar chuan CGTMSE (Credit Guarantee Fund Trust for Micro and Small Enterprises) Scheme chungchangah nimin khan SIDBI nen thawhhona thuthlung, Memorandum of Agreement a ziak a. Mizoram State Policy Coordination Committee Vice Chairman Dr. KC. Lalmalsawmzauva hmaah MoA hi Commissioner and Secretary, Commerce & Industries Dr. Lalzirmawia Chhangte leh CGTMSE CEO Manish Sinha ten an ziak a ni.

 

Nimin khan Serchhip-a District Beautification Committee chu Bawrhsap Paul L. Khuma hova thukhawmin 'District Beautification Competition 2025' chungchang an sawiho.

Village Council Inthlanpui neih zawh taka Serchhip Town chhung VC hrang hranga thlantlin te chu nimin khan inhmukhawmin Serchhip Town Joint VC hruaitu tur an thlang.

Serchhip-a Agriculture & Horticulture Co-operative Society Ltd. chuan Serchhip-a thlai thar rate tur an bithliah thar. Agriculture & Horticulture Co-operative Society, Serchhip hian Executive Meeting neiin an thlai tharchhuah te man man zawka hralhchhuah a nih theihna turin rate an bithliah thar a, hemi ang hian Zikhlum chu kg khat zelah a te Rs. 20/- leh a lian Rs. 15/- bakah Bawkbawn kg. khat Rs. 15/- a ni dawn a, hei hi tunkar Nilaini, Feb. 26, 2025 atanga hman tan tura ruahman niin Society Member te chu an rate siam ang zawm ngei tur leh he an rate siam ang ni lo chuan hralh leh kharchhawn tir loh nise an ti a.Hmundang leh khawdang atanga kharchhawng tur pawhin a tam thei ang ber la thei leh a man pe nghal thei turte ngei chauh chahluh/pek thin nise an ti bawk.

Mizoram sawrkar chuan Mamit leh Kolasib District-a Leilet neitute thar, Buhhum quintal 1400 chuang a lei tawh a, Buhhum hi nikum December ni 19 khan a vawi khatna atan quintal 480.30 leiin January thla ah vawi li leh February thla ah tum hnih lei a ni tawh a ni. Buhhum hi Mamit leh Kolasib District-a Leilet neitute bakah Society leh FPO kaltlangin kuthnathawk tuten OM OM Rice Mill, Pangbalkawn-ah kg khat Rs. 30 in an hralh thin a, Mizoram sawrkar chuan buhhum hi Om Om Rice Mill atanga leiin, Rice Mill-ah vek hian Ration buhfai atan pekchhuah leh tura ruahman a ni.

Horticulture Minister Prof. Lalnilawma chuan nimin-a ZPM Chhung Inkhawm ah Chief Minister in Sapthei a ngaih pawimawh thu sawiin, “Ministry lam chuan District pahnih ah min pawmpui tawh a, Central in sum min sanction theih hunah District panga ah bultan that leh nan Project kan thehlut mek bawk a ni,”a ti a, Link Road engemaw zat siam tura hma an lak thu a sawi bawk.

BJP Mizoram President Vanlalhmuaka chuan an Manifesto-ah thalai hnathawh tur nei lo, hnathawh tur hre lo lehkha thiam te'n hna an neihna turin hma an la dawn tih nimin-a an Party Karthar inhlanna leh Political Session-ah a sawi a, Mizo thalaite chu an beidawng mai ang tih a hlauhawm takzet tih sawiin, mahni inhaivurna laka fihlim kan mamawh thu a sawi bawk.

Mamit District SP Pukhraj Kamal IPS chuan Feb. 12, 2024 zan-a bo leh a tuk-a a ruang an hmuh Lalfakmawia (59), Bungthuam thihna chu uluk taka chhui a nih thu sawiin, he thihna hi a nupui Sondorung leh a thian hnai tak Ramnunmawia remruatna hnuaiah midang rawih belha chet lakna nia a lan thu a sawi a. He thihna thleng ah hian mi 7 manin inhnamhnawih an man kim nia an hriat thu leh heng mite hi thu an zawhfiah hnuah Jail a khung an nih tur thu a sawi bawk.

Institute of Advanced Studies in Education (IASE) kum 50-na (Golden Jubilee) an lawmna kal zelah Golden Jubilee puala siam, Relief Sculpture chu nimin khan Art & Culture Minister C. Lalsawivunga chuan hawngin IASE Golden Jubilee Souvenir chu a tlangzarh nghal bawk. He hunah hian Relief Sculpture siamtu IASE-a Art Instructor Lalnunpuia Kawlni chuan Relief Sculpture a siam chhan tlangpui sawiin, hmanlai Mizo pi leh pute hunlaia an nunphung leh khawsak dan hriat vek theih ni tawh lo mah se, a hunlaia an khawsak dan tlangpui chhinchhiahna pawi-mawh tak a nih avangin heng lung ker te hi siam a nih thu a sawi a. IASE chu zirna In a nih angin zirlaite’n Mizo pi leh pute khawsak thin dan tlangpui an lo hriat theih nana siam a nih thu a sawi bawk.

Lai Autonomous District Council (LADC)-a Chief Executive Member (CEM) atan ZPM hruaitu leh Paithar Bialtu MDC V. Zirsanga Governor in a pawmna chu nimin khan tihchhuah a ni a, ni 30 chhungin thlawptu a neih dan fiah tura tih a ni bawk.

Mizoram State-a Dan siamtu (Legislator) ten HIV/AIDS lama hma an lakna tur Committee sang, Mizoram Legislative Forum on AIDS chu nimin khan Health Minister Lalrinpuii hovin an thukhawm a, MLA te hian MLA Fund atanga Rs. 50,000/- theuh thawh an remti bawk.

Assembly Session kal mekah sawrkar atanga Dan siamna tur leh siamthatna tur Bill 8 a lut tawh.

Mizoram a rawn zin 16th Finance Commission Chairman Dr. Arvind Panagariya leh Member dangte chuan nizan hmasa khan Larsap Gen (Dr) Vijay Kumar Singh chu Raj Bhavan-ah an kawm.

Mizoram Governor Gen. (Dr) Vijay Kumar Singh chuan Reserve Bank of India (RBI) buatsaih Financial Literacy Week 2025 chu nimin khan hmanpuiin Sum leh pai enkawl chunchang inzirtirna lehkhabu (Financial Literacy Booklet) Mizorama Library hrang hrang 513 a dah tur chu a tlangzarh nghal bawk.

Mizoram tlawh-a rawn zin mek 16th Finance Commission Chairman Dr. Arvind Panagariya leh Finance Commission Member-te chu nimin tlai khan Aijal Club-ah Mizoram aiawhin Mizoram Chamber of Commerce and Industries, Autonomous District Council, Political party hrang hrang te leh tlawmngai pawlte chuan hmuin Mizoram mamawh te an thlen a. He hunah hian Autonomous District Council pathum- CADC, MADC leh LADC-te chuan anmahni huamchhung theuha sum leh paia an dinhmun leh an harsatnate an thlen a. Mizorama political party hrang hrang Zoram People’s Movement (ZPM), Mizo National Front (MNF), Mizoram Pradesh Congress Committee (MPCC), Aam Aadmi Party (AAP) leh Bharatya Janata Party (BJP)-te chuan tawngka leh ziakin Mizoram mamawhte an thlen bawk a. Local Body hrang hrang - Aizawl Municipal Corporation, Lunglei Municipal Council, Aizawl City Local Council Association leh All Mizoram VC Association-te pawhin an dinhmun theuhte Commission hmaah hian sawifiahin, tlawmngai pawl hrang hrang aiawhin MHIP...

Mizo Students’ Union (MSU) General Hqrs. hruaitute chuan nimin khan Home Minister K. Sapdanga chu a Pisa-ah hmuin tunhnaiah Social Media lama Birth Certificate leh Marksheet siam thei ni a insawi an awm thin chu tha an ti loh thu leh heng mite hian document lem hmanga pawi nasa tak an khawih theih avangin a chhuichhuah kawngah chak zawka hmalakpui turin an ngen a. Social Media Group-a Birth Certificate leh Marksheet lem siam thei nia insawi leh inzuar te chu chhuichhuah an nih theih nan nimin vek khan MSU hian First Information Report (FIR) chu Aizawl Police Station-ah an thehlut bawk a ni.

Mizoram-a rawn zin mek 16th Finance Commission Member leh Official lo kalte chuan nimin khan Mizoram sawrkar-a hotu pawimawh te kawmin he hunah hian Finance Department atangin Finance Commission hmasa atanga sum hmuh dan leh a hman dan te tarlan a ni.

 

Tun thla ni 20 tanga Mizoram sawrkar in Secondary Collection Centre (SCC) hrang hranga Sawhthing a lei chu Serchhip District-ah pawh la lei chhunzawm zel a ni a, Inrinni khan Serchhip District-a SCC pahnih ah Sawhthing hi buk leh niin Serchhip SCC (Chhiahtlang)-ah kg. 15573 (quintal 15.57) leh Chhingchhip SCC-ah kg. 3134.3 (quintal 31.34) buk leh a ni. Heti hian Serchhip District-ah ni thum chhung Sawhthing hi buk ni tawhin a ni hmasa berah quintal 1216 buk a ni a, a ni hnihna ah quintal 174.26 buk lehin a ni thumna ah quintal 46.91 buk leh a ni a, Sawhthing lei thawh khatna hi thla khat chhung kalpui turin an inngai tih Serchhip-a hemi chungchang buaipuitute chuan LENKAWL an hrilh a ni.

Serchhip Sailiam Presbyterian Kohhran Biak In thar chu Inrinni khan Synod Moderator Rev. RC. Lalnghakliana chuan a hawng.

Mizoram Presbyterian Kohhran-a Kohhran Pavalai Pawl (KPP) Pastor Bial thenkhat te chuan nimin Pathianni hmang khan Intawhkhawmna hun an hmang a, Serchhip Pastor Bial KPP te chuan Serchhip Kawnpui Kohhran-ah Intawhkhawm vawi 7-na hmangin ‘I chhungkaw khawsak rel fel rawh’ tih thu thupui atan an hmang a, Speaker atan Rev. Lalsangbera chu hman a ni. New Serchhip Bial KPP Intawhkhawm vawi 7-na pawh nimin Pathianni hmang khan New Serchhip North Koh-hran Biak In-ah neih a ni bawk a. Chhiahtlang Kawn Veng Pastor Bial KPP Intawhkhawm vawi 9-na chu Kawn Veng Kohhran Biak In-ah an neih bakah Chhiahtlang Pastor Bial KPP Intawhkhawm pawh Chhiahtlang Hmar Veng Kohhran Biak In-ah neih a ni bawk.

Serchhip District chhung Khawbel khuaa David Lalchhuanmawia chenna In chu nimin chawhma dar 10:10 vel khan a kang a, bungrua engmah chuh hman a ni lo. Thudawn danin he In hi Assam Type niin kangmei chhuah tan lai hian In neitu hi a awm loh avangin kangmei chhuah chhan hi hriat a ni lo a, mihring thi leh hliam awm lovin In dang a kangkai tur mi tlawmngai ten an veng hman a ni.

Serchhip Bialtu MLA leh Chief Minister Lalduhawma chuan tunhnai khan Govt. Middle School Chanmari, Serchhip hnenah Laptop Computer leh Printer a pe a, heng te hi Chief Minister aiawhin ZPM |halai Block chuan Zirtawpni khan hlanin School enkawltute chuan Chief Minister chungah an lawm hle tih an sawi a ni.

Mizoram Health Systems Strengthening Project hmalakna hnuaia Walk For Health Walkathon 2025 neih chu Serchhip khawpui chhung Veng hrang hrangah kalpui chhoh mek zel a ni a, Walk For Health Walkathon 2025 hi Serchhip-a a hmasa ber atan Ningani-a Serchhip Field Veng-a neih a nih hnuah Zirtawpni khan Vengchung-ah nei lehin Inrinni khan Serchhip Chhim Veng-ah neih leh a ni a, Vawiin hian Serchhip Kawnpui-ah neih leh a ni ang. Walk For Health Walkathon 2025 hi inkaichhawn theih natna ni lo- Thisensang, Zunthlum Cancer leh Stroke te venna atan leh hriselna tha kan neih theihna tura ke-a kal tam a pawimawh zia inzirtirna atana ruahman a ni.

Home Department chuan ramri buai chungchang inbiakna atan Assam sawrkar hnenah lehkha a thawn leh tawh. Home Department hotute sawi danin tun tum hi lehkha vawi thum an thawnna a ni tawh a, a hmasa pahnih an thawnte chu chhanna an la dawng lo a ni. 

Mizoram sawrkar-a Finance Department chuan Finance Commission 16-na hnena Mizoram sum mamawhte lo thlenna tur Memorandum chu an peihfel tawh a, sawihona hnuhnung ber pawh a hmawr an bawk tawh a ni.

Inrinni kalta-a Tuivai leh New Vervek inkar a lirthei chesual-ah V. Lalhmingthanga (55), Sakawrdai chu a boral a, nimin khan vuiliam a ni. Thudawn danin V. Lalhmingthanga hi Inrinni khan Chief Minister in Tuivai Lei a hawnna ah kalin programme hman zawh hnua an haw lam chu an Motor hi chesualin kawngthlang ah a tlanliam a, he Motor-ah hian mi 5 an chuang a ni.

Chief Minister Lalduhoma chuan Inrinni khan Darlawn BDO Office Tual-ah Mizoram a Watershed Yatra Campaign neih tur a hawng a, PMKSY chu Central Scheme pawimawh tak a nih bakah mitin nghawng phak thil a nih thu sawiin, “PMKSY in a tum ber chu leilung leh tuihna chhe zel ven a ni a, hmalakna pawimawh tak a nih avangin Central sawrkar pawhin a la thutak em em a, mitin nghawng thil a ni a, mipui pawhin chiang taka hre tur leh ngaihven turin kan in chah duh a ni,” a ti. Watershed Yatra Campaign-in a tum ber chu PMKSY Project thil tum - rambua siamthat leh tuihna humhalh leh tuai thar tulzia zau zawka mipuite zirtirna a ni a. PMKSY Project kalpuina hmun khaw hrang hrangah Watershed Yatra hi hman chhunzawm tur niin PMKSY hi Mizoram District tinah kalpui mek a ni a, khaw 52 zet tuamin hmalakna hi kalpui a ni.

Mizoram-a ni li (4) cham turin 16th Finance Commission Chairman Arvind Panagariya leh Member dangte chuan nimin khan Aizawl an rawn thleng a, 16th Finance Commission atanga rawn kal te hi sawrkar mi pawimawh ten Lengpui Airport-ah lo dawngsawngin Hunthar Veng-a lei tlahniam hmun pawh an en nghal a. DM&R leh PWD hotu ten kum 1990 atanga kum 2024 chhunga helai hmun a leilung chet dan leh inkalpawhna kawng a harsatna hrang hrang a thlen thin dan te an hrilhfiah bawk a ni.

Mizoram District hrang hranga PHE Department Tui sem dan atanga a lan danin, District tam zawkin thla tin vawi 2 atanga vawi 5 tui an dawn thin laiin, Mamit District chuan thla khatah vawi khat an dawng thin.

Gauhati High Court Judge, Justice Marli Vankung chuan Inrinni khan Champhai Dinthar Veng-a Judicial Quarters sakna tur hmunhma leh Champhai Vengsang-a District Court Building thar sak mek te tlawhin Khawzawl District Court leh Judicial Quarters sakna tur hmunhma te pawh a tlawh bawk.

UD&PA Department changtu Minister K. Sapdanga chuan Inrinni khan UD&PA hnuaia hmasawnna ruhrel hrang hrang thawh mek hmun pariat a mi a endik a, heng hna te hi Zodin Multi Level Parking cum Utility Centre; Tuikual-a Reconstruction of Sanitation Site Office; MINECO-a Aizawl Convention Centre (Phase I & II); Tuikual North-a Multi Utility cum Community Centre; Chawnpui-a Extension of Sports Centre leh Multipurpose Hall, Chawnpui; Zonuama Multipurpose Community Hall leh Chaltang-a Multipurpose Parking cum Vegetable/Meat Market te an ni a. Heng hna zingah hian kum 2018 atanga thawh tan tawh Zodin Multi Level Parking cum Utility Centre chu mipuiin an nghahhlelh tawh thu a sawi bakah Contractor te pawh tang lehzuala thawk turin a hrilh a ni. He Project-ah hian Smart Transformer installation leh Robotic Parking chu Testing and Commissioning hmabak a ni a. Hei hi a rang thei anga thawk turin Department lam Official te leh Contractor te chu a hriattir bawk a ni.

Mizoram Larsap Gen. (Dr) Vijay Kumar Singh chuan Kolasib District chhunga National Highway thawmthat hna kal muang chuan mipuite harsatna nasa takin a thlen tih a sawi.

Chief Minister Lalduhoma chuan ‘Unity Bridge’ tia a hming vuah, Mizoram leh Manipur inrina-a Tuivai Lei chu Inrinni khan a hawng.

Mizoram sawrkarin AAY leh PHH a tel lo, chhungkaw harsa bikte tan a bika Ration Card a buatsaih, Ration Card Sen, Mizoram State Special Ration Package-ah chhungkaw 7,652 dah an ni tawh.

Indian Air Force (IAF) hnena Lengpui Airport hlan dan tur chungchang zirchiang mektu, Working Committee on Lengpui Airport-in Draft Memorandum of Agreement (MoA) an buatsaih hun chhung chu pawhsei a ni a, Chief Minister Lalduhoma chuan AAI dawr an nih leh dawn thu leh a rem loh chuan huaisen taka an kal a ngaih dawn thu a sawi bawk.

Mizoram sawrkar in ruahmanna a siam anga niminpiah atanga sawrkar in Sawhthing a lei chu nimin khan Serchhip District-a Secondary Collection Centre (SCC) pathum-ah chhunzawm leh a ni a, nimin khan Thenzawl SCC-ah Sawhthing kg. 14839.7184 (quintal 148.39) buk lehin Serchhip SCC-ah kg. 9487 (quintal 94.87) buk leh a ni a, Chhingchhip SCC-ah kg. 6459.8 (quintal 64.598) buk lehin Chhingchhip SCC atanga lei tura ruahman lawk thenkhat an hralh loh avangin lei tura ruahman zat an lei phak lo thung a ni.

Serchhip District Sports Committee (SDSC) chu nimin khan an Chairman leh Bawrhsap Paul L. Khuma hoin Serchhip DC Meeting Hall-ah an thukhawm a. He thutkhawm ah hian SDSC Secretary Dr. Marilyn Lalruatkimi hnen atangin thut-khawm neih a nih chhan te ngaihthlak a nih hnuah SDSC Asst. Secretary Vanlalhruaia chuan Sports Association te hnena Promotional Fund an pek chhuah chungchang a sawifiah a, District chhunga Recognized Association hrang hrang paruk te bakah District Sports Committee in Sports Complex ram teh that chungchanga hma a lakna senso hrang hrang atan Rs. 1,11,750 chu pekchhuah tura pawm a ni.

Tun thla ni 23 atang khian 16th Finance Commission chuan Mizoram rawn tlawhin Serchhip District an tlawh dawn avangin heng mite lo dawnsawn dan tur hi nimin khan Serchhip-ah Bawrhsap Paul L. Khuma hovin sawiho a ni.

Academic Session kal mek 2024-2025 ah zirna In hrang hrangte chuan Third Term Exam nei zovin Class thenkhat chuan result an tichhuak tawh a, School Education Department in School Calendar a tichhuah atanga a lan danin zirna In te hian tun thla ni 17 atang khan Third Term Exam hi neiin Feb. ni 28 khian result pawh tihchhuah hman tur a ni. March 1 atangin zirna In te hian chawlh hmangin April 7-ah Academic Session thar atan zirna In te hawn leh a ni ang.

Serchhip leh Hriangtlang inkar kawngpui chu Blacktop a nih theihna turin tunhnai khan enfiah thar leh a ni. Serchhip leh Hriangtlang inkar kawng hi PMGSY-I hnuaiah a laihzauh hna thawh a lo ni tawh a, amaherawh chu PMGSY-II hnuaiah Blacktop tura beisei chu zawh hman a nih ve tak loh avangin a tel hman ta lo a. Hun engemaw chen Blacktop loh-a a awm hnuah leh PMGSY-III hnuaiah telh theih a nih loh hnuah PMGSY-IV hnuaiah kum 2011 Cencus anga mipui chen tam dan enin Blacktop theih tura ruahman a ni a, Hei vang hian tunhnai khan PWD Ser chhip Division chuan Survey nei lehin he kawng, KM 22-a thui hi teh that leh a ni a, Project Report te siamin PMKGSY-IV hnuaiah blacktop theih ngei beisei a ni.

Nimin khan Mizoram chhunga District 9-a School thlan bikah te Pawl 3 leh Pawl 6 Random Examination chu buatsaih a ni a. Primary School 217 leh Middle School 107 atangin zirlai naupang 2950 chuangte chuan exam hi an hma-chhawn a ni. Random Examination-ah hian Naupangte chu Common Question chhantir niin hei hi National Education Policy (NEP) 2020 in a tum tihhlawhtlinna atana rahbi thar pakhat niin, Zirlaibu in zirchhuahpui a tum Learning Outcomes te naupangte chu a zirchhuahtir em tih hriatna atan a pawimawh hle tur a ngaih a ni.

Nimin-a Mizoram Legislative Assembly Session-a zawhna leh chhanna hunah MNF Member leh Opposition Leader Lalchhandama Ralte zawhna chhangin Higher & Technical Education Minister Dr Vanlalthlana chuan Mizoram sawrkarin College din belh emaw, a awmsa sawikhawm (amalgamate) tumna a neih loh thu House a hrilh a. Tourism Minister Lalrinpuii chuan BJP Member Dr. K. Beichhua zawhna chhangin Leitlangpui Music Festival-2024 atan sawrkar sum cheng nuai 20 sen a nih thu House a hrilh bawk.

Mizoram Larsap General (Dr) Vijay Kumar Singh chuan Vawiin hian Kolasib District a tlawh dawn a, nimin khan Governor lo dawnsawn dan tur chi Bawrhsap hovin ngaihtuah a ni. Mizoram State Governor, General (Dr) Vijay Kumar Singh hi tukin dar 8:30 hian Kolasib thleng tura ruahman niin, DC Conference Hall-ah Kolasib DC leh Head of Office-te nen Inkawmhona an nei dawn a. Hemi zawhah hian India rama sipai Training-na hmun pawimawh tak, Counter-Insurgency and Jungle Warfare School (CIJWS), Vairengte a tlawh dawn a ni.

Mizoram sawrkar Health & Family Welfare Department hnuaia National Health Mission (NHM) leh DDK-te chuan Health Department hnuaia mipuite hriselna leh zirtirna lama hriattur pawimawh leh hmalakna hrang hrang program-te Doordarshan Aizawl a tihchhuah thinna tur atana thawhhona thuthlung chu National Health Mission (NHM) Mizoram Mission Director Room ah an ziak a, he thawhhona tura program siam tur thupui atan hian ‘Mi tin ban phak hriselna’ tih a ni dawn a, Zirtawpni chawlhkar hnihna leh a tuk Inrinni-ah te tihchhuah a ni ang a, thlakhat ah vawi 4 tihchhuah thin a ni dawn a ni.

Mizoram Assembly House-a Leader of Opposition Lalchhandama Ralte chuan niminpiah atanga sawrkarin Sawhthing a lei tan ah sawrkar chuan a ba in Sawhthing a leisak niin a sawi a, engtik ah kuthnathawktute account-ah Sawhthing man chu sawrkarin a thunsak dawn tih chu a zawhna a nih thu a sawi a ni. Hei bakah hian sawrkarin Hmunphiah a lei dana Collection Centre hnai awm loh avangin kuthnathawktuten harsatna an tawk niin a sawi a, Collection Centre siam dan ennawn a, a aia tam siam a tul thu a sawi a, sawrkar chuan Hand Holding a kalpui dan-ah an beidawn loh nan hma la leh turin a ngen tih a sawi a ni.

Chief Minister Lalduhoma chuan sawrkarin Sawhthing a lei tan ah Sawhthing man tur District tinah dah sa vek niin sawrkarin Sawhthing man a ba dawn lo tih a sawi.

PHE Minister Prof. Lalnilawma chuan, sawrkarin Tui bill tihsan tumna a neih loh thu leh Tui bill tihsan chungchang chu mi thenkhat thu vawrhdarh mai mai niin a sawi a. Tui-a Aizawl chawmna atana tui an pump na ber Tlawng lui-ah tui a tlem zel thu House a hrilh bawk.

PM-Surya Ghar Muft Bijli Yojana (PM-SGMBY) hnuaiah Rooftop Solar bun te hnena Mizoram sawrkarin subsidy a pek pawisa hlanna chu nimin khan Aizawl-a Kawlphetha Office-ah neih a ni a, Power & Electricity Minister F. Rodingliana chuan a hmanpui a ni.

Mizoram State Project Monitoring Committee (MSPMC) chuan report an dawn bawhzuiin Kawnpui-Durtlang-Aizawl Road BRO hnuaia resurfacing hna thawh meka Sihphir leh Lungdai inkar chu nimin khan a hmunah kalin an enfiah a, Sihphir leh Lungdai inkar, Lungdai thlen hmaah resurfacing hna thawh lai mek ah tha tawk lo engemaw zat hmuh a ni. He hna hi Contractor BRN Infrastructure Pvt. Ltd., Jaipur, Rajasthan te thawh a ni a, he hna thalo hi belhkhawm in Kilometer khat bawr vel a ngaih theih tur a ni a. Hna tha lo zawng zawng hi Contractor te hian hai khawh leh vek a, resurfacing hna hi tih that leh vek an tum thu an sawi a ni. He kawng endikna ah hian MSPMC Secretary Er. Lalthanzuala Ralte leh a thawhpuite bakah PWD hotute telin Lungdai khawtlang hruaitute VC leh YMA bakah BRN Infrastructure Pvt. Ltd. a hotute an tel bawk a ni.

LESDE Minister Lalnghinglova Hmar chuan, District zawng zawnga District Facilitator nei turin sawrkarin hma a la mek tih a sawi.

Nimin-a Mizoram Legislative Assembly thutkhawm ah India Prime Minister hlui, nikum a thi ta Dr Manmohan Singh-a sunna hun hman niin ngawi rengin Minute khat chhung Member te an ding a ni.

Mizoram State Policy Coordination Committee hnuaia Apex Body chu nimin khan Planning & Programme Implementation Department Committee Room-ah thukhawmin Sawrkar Department 15 kaltlang a Progress Partner dilna lutte an enfiah a, he hunah hian Implementing Department 15 atanga Detail Project Report thehluh 520 endik a ni. Thutkhawm a tarlan danin Hand-holding scheme hnuaia Progress Partner ni tur a dilna hi Implementing Department 15 kaltlangin 11430 a awm a. Implementing Department-te zirchianna atangin hmalak pui tlak a ngaih, Detail Project Report thehluh 520 chu Apex Body hian a endik a ni. DPR thehluh zawng zawnga loan dil hi Rs. 61,30,72,748 a ni a, chawhrualin DPR pakhat a loan dil zat hi Rs. 12,16,414 ang a ni. He thutkhawmna a dilna pawmte hi Bank-in uluk takin a endik leh tur thu he hunah hian tarlan a ni bawk.

Lunglei leh Tlabung inkar National Highway-302 kawngpui laih zauh hna thawh mek dinhmun chu nimin khan Lunglei District Deputy Commissioner ruahmannaa din, Inspection Team te chuan a hmunah an enfiah.

Bharat Rural Livelihoods Foundation leh Axis Bank Foundation huaihawt 'National Tribal Livelihoods Submit, 2025' chu nimin khan New Delhi-a Dr. Ambedkar International Centre-ah neih a ni a, he hun hi Social Welfare & Tribal Affairs and Women & Child Development Minister Lalrinpuii chuan khual zahawm niin a hmanpui a ni.

Mizoram sawrkarin khawsak harsa zawkte tana Scheme a duan hnuaiah Ration Buhfai man tlawma dawngtu 29785 an awm tawh.

Sawrkar kum kal mekah Mizoram sawrkar chuan Lottery atangin cheng nuai 1388 chuang a hmu tawh.

 Pathian Lal Ram Sawrkar (PLRS) - Rev. Dr. Zaichhâwna Hlâwndo  

 

Mizoram State Day 2025 pualin nimin, Feb. 20, 2025 khan Serchhip Auditorium-ah ram tana tawngtai rualna hun hman a ni.

Mizoram sawrkar Flagship Policy ‘Ban a Kaih’ hnuaia Sawhthing lei leh hralh chhuah thawhkhatna chu nimin khan Mizoram hmun hrang hrangah kalpui tan a ni a, Serchhip District-ah pawh Sawhthing hi leiin Sawhthing lei te hi hmunpui lamah thawnchhuah leh nghal a ni.

Health & Family Welfare Department hnuaia Mizoram Health Systems Strengthening Project hmalakna hnuaiah nimin khan Walk For Health Walkathon 2025 chu Serchhip-ah neih tan a ni.

Kolasib Tuitha Veng Hebron-a Elvis-a te chenna In, Assam Type chu nimin chawhma lam khan bungrua engmah chuh hman lohin a kangral a, mihring thi leh hliam erawh an awm lo a ni. Kangmei chhuah lai hian In neitute an awm loh avangin kangmei chhuah chhan hi hriat a ni lo a, nimin vek khan Bawrhsap Robert C. Lalhmangaiha chuan a hmunah tlawh nghalin tanpuina awm thei te a ngaihtuahpui nghal a ni.

Mizoram Legislative Assembly Budget Session neih mekah Dan thar siam tur leh Dan dinglai siamthat tura rawtna 7 thehluh a ni tawh a. Sawrkar Bill te hi LESDE, UD&PA, Finance, Higher & Technical Education, Information &Public Relations leh Excise & Narcotics Department te atanga lut a ni. Niminpiah-a tan Mizoram assembly Session hi Mizoram State Day, nimin-a chawlh a nih hnuah Vawiin hian chhunzawm leh a ni dawn a. Vawiin hian Prime Minister hlui Dr. Manmohan Singh sunna hun bakah, zawhna leh chhanna hun hman a ni anga, hemi hnu hian Larsap thusawi chunga lawmthu sawina Motion sawiho a ni anga, chumi hnuah hun awm dan a zirin Private Member Resolution sawiho tura thum vawr hmanga thlan sawiho a ni ang.

State puitlinga Mizoram hlankai ni, Mizoram Statehood Day vawi 39-na pualin nimin khan Aizawl leh Mizoram hmun hrang hrangah ram pum huap tawngtaina hun, State Day of Prayer hman a ni.

Revenue Minister B. Lalchhanzova hovin niminpiah khan e-ram portal go-live na hun hman a ni.